Qaanaaq

Qaanaaq: Seqineq ulloq ataaseq sioqqullugu nueqqippoq

Seqerngup nueqqinnera Kalaallit Nunaata illoqarfiisa avannarpasinnerpaartaani innuttaasut nuannaarutigaat

Qaanaami seqineq nuivoq februaarip 17-ani

Seqerngup nueqqinnera Qaanaami innuttaasuusut 635-t nuannaarutigaat.

Avanersuup Atuarfiani pisortap Dan D. Normannip tamanna oqaluttuaraa.

- Februaarip 17-ani seqineq nuisaraluarpoq nalunaaqutaq 13.00. Kisianni ukioq kingullertulli seqineq februaarip 16-ni nuivoq, Sermitsiaq.AG-mut oqaluttuarpoq.

Ilinniartitsisunngorniat oqalugiarput kiisalu seqineq pillugu erinarsoqatigiittoqarluni.

- Ulloq nuannerpoq, nuiaqarnani 30-nillu issilluni. Taamaakkaluartoq oqartoqarpoq sila kialaarnerulersoq. Meerarpassuit sisorarput. Seqerngup nueqqinnera nuanneqaaq, oktobarip 24-ani kingullermik seqineqarpugut, Dan D. Normann oqarpoq.

Meeqqanut poor'lullertoqarlunilu kakaavillertoqarpoq. Nalunaaqutaq 14.00 qimussernermik unammisitsisoqarpoq. Arnat angutillu iligiiaarlutik qimussertinneqarput tamarmik tallimanik qimmilerlutik. Unammisitsinermi iligiit aqqanillit peqataapput.

'Inughuin Nipaan' aamma Kaalaaraq K. Qujaukitsoq katersortarfimmi unnukkuani aliikkusersuipput. Aliikkusersuinerit assigiinngitsut ingerlanneqarput soorlu aamma Piitannguaq Alaufesen aliikkusersuisoq.

Powered by Labrador CMS