Qaanaaq amerlanerusunik takornariartoqartalernissaanut piareersartoq
Campus Kujalleq Qaanaami pikkorissaagami takornarianik angallassisartunngortussat 23-t naammassitissimmavai.
Qaanaami Qaanaallu nunaqarfiini Siorapalummi Qeqetamilu innuttaasut 23-t Campus Kujalliup Qaanaami takornarianik angallassisartunngornianik pikkorissaanerani naammassisimapput.
Ilulissat mittarfissuaqalerpat Qaanaamut takornariartartut amerlanerulernissaat naatsorsuutigineqarpoq, innuttaasullu misigisassarsiorlutik takornarianik aamma umiarsuartigut takornarianik amerlanerusunik sullissisalernissamut piareersimanissaat naatsorsuutigineqarluni.
Pikkorissaanermi sammineqarsimapput sumiiffiup oqaluttuassartai, inuusaatsip paasisimaneqarnerulernissaa, kulturit assigiinngitsut imminnut naapittarnerat, ulluinnaat ukiullu nikerarneranni pisartut nalliuttullu pillugit oqaluttuatsialaat kiisalu piujuartitsineq, angallassinissamut pilersaarusiortarneq, oqaluttuariaatsit kiffartuussisarnerillu. Campus Kujallerq tusagassiorfinnut nalunaaruteqarnermi ilisimatitsivoq.
- Pikkorissartut tikeraanik assigiinngitsunik tikilluaqqusisarnermik kiffartuussisarnermillu ilisimasaqarluareerput, kiisalu kulturi ileqqullu malillugit inuusaatsimik pissanganartumik takutitsinissamut ilisimasaqareerlutik. Campus Kujalleq takornarialerinissamut arlalinnik sinaakkusiisumik periuserineqartartunillu ilinniartitsissimavoq, Campus Kujalleq allappoq.
Najukkami takornariaqarnerulertoqarnissaa naatsorsuutigineqartoq
Campus Kujalleq naapertorlugu, pikkorissartut sumiiffimmi takornariaqarnikkut siuarsaasoqarneranut isumalluarlutik aamma ilikkagaqarnerunissartik oqaatigisimavaat, pikkorissaasoqarneranummi peqataasut ilaat takornarianik angallassisartutut misilittagaqareerramik.
- Coronap, pisassiissutit silallu pissusaata allanngoriartornerata malitsigisaannik, piniariarlunilu aalisariarsinnaanngikkaanni suliffissat amigaatigineqarput. Peqatigitillugu peqataasut arlallit takornarianut allanut tuniniagassaqarnerunissaq nutaanillu neqerooruteqartarnissaq eqqarsaatigalugit takornarianik sullissisarnerup atuutereersup ineriartortinneqarnissaa kissaatigaat, Campus Kujalleq allappoq.
Campus Kujalleq siusinnerusukkut ilaatigut Ilulissani, Aasianni, Tasiilami Ittoqqortoormiinilu takornarianik angallassisartussanik pikkorissaasimavoq, tassani kalaallit takornarianik angallassisartut amerlanerusut pisariaqartinneqaraluttuinnarnerat aaqqiiffiginiarlugu.