Qaanaap eqqaani siusinnerusukkut sikuerpoq
Kiassiut nalinginnaasumit 15 gradinik maanna qaffasinneruvoq.
Nalinginnaanngitsumik kiannerata kinguneranik Qaanaap eqqaani maanna sikuerussimavoq. Politiken taama allaaserisaqarpoq.
Siku immap killingata ataaniittoq, nalinginnaasumik aasalernerani aakkarluni aggululluni aakkiartortaraluarpoq.
Kisianni nalinginnaasumik 15 gradinik kiannerunerata kingorna, sikup qaava siulliulluni aakkiartorpoq.
- Sikup qaavani taama imaqartigisarnera nalinginnaanngilluinnarpoq. Sumiiffik tamarmi nalinginnaasumik kianneruvoq, taamaattumillu taama imartaqartigaaq, Danmarsk Meterologiske Institutimi, DMI-mi silap pissusianik ilisimatusartoq, Ruth Mottram, Politikenimut taama oqarpoq.
Taassuma Steffen Malskær Olsen suleqatigaa, taassuma sikup qaava imaannaasoq tupaallannartoq assilisimavaa.
Taassuma suliniummi Qaanaami piniartut qanimut suleqatigai. Suliniummi sikumut Inglefield Bredningimi ukioqqammernerani ukiut tamaasa atortunik ikkussisarput, aasalerneranilu sikuerutinnginnerani atortut aasarpaat.
Ilisimatuut nalinginnaasumik qimussimik angalasaraluarput, kisianni sumiiffik imaannanngorsimammat, ilisimatuut atortuminnik aallerniarnerat unammillernarsimavoq.
Sapaatip-akunnerata siuliani Kalaallit Nunaat aamma Issittup ilarujussua kiappoq, anorit kissartut kujataaneersut pissutaallutik, Ruth Mottram oqaluttuarpoq. Qaanaap eqqaani silasiorfik pingasunngornermi 17,3 gradinik kianneranik nalunaarsuivoq, sisamanngornermilu 15 gradit, ukiup imaalinerani nalinginnaasumit 1,6 gradinik kiannerulluni.
Uani sapaatip-akunnerani pisoq ingasattoq, silap pissusiata allanngoriartornerinnaanut attuumassuserneqarsinnaanngitsoq, Ruth Montramip naqissuserpaa.