Qaanaaq
Qaanaap eqqaani misileraalluni aalisarnissaq piumasarineqartoq
Qaanaap eqqaani qalerallit aasaanerani tammakartarput aalisartullu isertitaat appariarujussuartarlutik. Taamaattumik aalisartut piniartullu peqatigiiffiata aasaanerani misileraalluni qaleralinniartoqarnissaa piumasaraa. Kisianni Aalisarnermut Piniarnermullu Naalakkersuisoqarfik misileraalluni aalisarnermik ingerlatsiumanngilaq
Qaanaami aasaanerani seqineq kaaviinnalersarpoq, tamatumalu kinguneranik ulloq unnuarlu kaajallallugit piniarniartoqarsinnaalluni aalisartoqarsinnaallunik.
Taamaakkaluartoq Kalaallit Nunaanni illoqarfiit avannarlersaanni aasaanera piniartunut aalisartunullu arlalissuarnut suliassakilliorfiusarpoq.
Piniartut tamangajammik ukiunik kingullerni qaleralinniarnermut ikaarsaariarsimapput, ukiuuneranilu sikukkut ningittagarsornermi qaleralippassuit qallorneqartarlutik.
Kisianni juunimi sikueraangat qilalukkat qernertarpassuit Qaanaap eqqaanut tikittarput, tamannalu qalerallit imartamit tammakarnerannik kinguneqartarluni.
Qaanaap kangerlussuani qaleralippassuit aasaanerani sumunnartarnerat qularnaarlugu suli ilisimaneqanngilaq.
Tamatuma kinguneranik aalisartut aningaasarsiornerat aasaanerani appariarujussuartarpoq. Taamaattumik najukkami aalisartut piniartullu peqatigiiffiat Q.A.P.P piumasaqarpoq, Namminersorlutik Oqartussat aasaanerani aalisakkanik piumaneqaqisunik aaqqissuussaasumik misileraalluni aalisartitsissasut.
Royal Greenlandip aamma Inughuit Seafood A/S-ip Qaanaami aalisakkanik tunisassiorfik ingerlataraat. Aalisakkanik tunisassiorfiup qerititsivia maajimili atorsinnaajunnaarsimavoq, taamaattumillu tunisineq unitsinneqarsimalluni.
Qerititsivilli kingoraartissanik tikittoqareermat juulip naalernerani atorneqaqqilerpoq. Avatannguaq Imiina, aalisakkanik tunisassiorfiup pisortaa, oqarpoq, aasaanerani taamaallaat mattannik tunisisoqarsinnaasoq. Qaleralinnik tunisineq ukiup naalernerani sikuppat aallarteqqissaaq.
Allaaserineqartoq tamaat aviisimi Tamanut Avannaanimi atuarneqarsinnaavoq. Aviisi akeqanngitsumik ataani aajuk: