Qaanaap eqqaani amaroq pisarineqarpoq

Qillaq Danielsen piniaqatinilu Jørgen Umaq tallimanngormat septembarip sisamaani qilalugarniariartussallutik Qaanaap kujataatungaanut aallarput.

- Qilalukkanik utaqqigaluaratta imaq qerneraaleriarmat illuaqqamukaannarpugut. Unnuami marlunngoriartortoq illuaqqamiit anillallunga 50 meterip missaani ungasissusillip qaqqajunnap qaavani takulerpara amaruugunartoq qaqqajunnap qaavaniittoq.

Nangippoq:

- Qinnguserakku aarimmi amaruugunavippoq, amaqqummi TV-mi taamaallaat takusarakkit assut eqqarsariaallappunga, piniaqatigalu erngerlugu oqarfigaara – amarorsuaq aajinnga! Qillaq Danielsen oqaluttuarpoq.

Erngerluni arpappoq
Qillaq Danielsen pileritsaqaluni erngerluni annoraani qarlippaanilu peerasuarpai arpallunilu amaqqup tungaanut aallarluni, amarorlu qaqqajunnamiit tarrippoq.

- Unioqinagatsigu aappara aallaammik 30-06-mik tunivara, uangalu 243 atorpara taannalu qinngutitaqanngilaq. Qaqqajunnaq amaqqup qaqisimaarfigisimasaa qaangerakku kuup tungaanut qiviarama takuara aarimmi taaka amaroq kuup eqqaanut pisimasoq, seqqorakku qarsuppara uniorlugu.

Nangipporlu:

- Seqqoqqikkamalu pisareqaara, niperalu tamaat avanersuarmiutut nilliavunga: ‘Amaruleqihugut – amaruleqihugut!’, tamannalu pivoq arfininngornermi unnuakkut nal. 01.45 missaani, Qillaq pisaminik alutorsarpalulluni oqaluttuarpoq.

Allat amaqqumik pisaqartut
Qillaq Danielsen ullumikkut 48-nik ukioqartoq oqaluttuarpoq, 17-nik ukioqarluni qimminik qimuttussaminik pisaaramili piniartunngorsimalluni, piniartuunerminilu amaqqumik takunngisaannarsimalluni aatsaat siullerpaamik naammattoorsimavoq pisaqarlunilu.

- Upernaaq maajimi Qeqertarmiut amarorsimapput. Aamma siornaak sioqqani amaqqup piarallip tumai takuneqarsimapput. Maani eqqaani tuttunik takussaasoqartaraluarpoq, maannali tamakku ukioq manna ersinngillat ilimanarpoq amarunissimagunarmat taakkunannga pisarineqartarsimassagunartut, Qillaq Danielsen oqarpoq.

Qillaq Danielsenip pisaa nalinginnaanngitsoq uuma ataani takuuk