Qaanaamut qimussimik angalaneq sivisooq
Ilaqutariit Kristensenikkut Savissivimmeersut Pituffimmut Qaanaamullu marsi naasoq qimussimik aallarput, piffissamilu tulliuttumi Savissivimmut uterlutik tikikkunik700 kilometerit tungaannut qimussimik angalasimassagitsik naatsorsuutigalugu.
I laqutariit piniartukkormiut Savissivimmeersut, Olennguaq Kristensen, nulialu Naduk N. Kristensen, taakkualu erneri sisamat, martsi naalersoq qimussimik Pituffik Space Base-mut aallarput tassanngaanniillu Qaanaamut ingerlaqqillutik, piffissamilu aggersumi Savissivimmut uteqqinnissartik maana pilersaarusiuleruttorpaat. Savissivimmiit Pituffik Space Base aqqusaarlugu Qaanaamut qimussimik sikukkut nunakkut sermikkullu siumuinnaq aqqutaa 330 kilometerit sinneqarpoq, ilaqutariillu ulluni makkunani Savissivimmut uterlutik tikikkunik 700 kilometerit tungaanut qimussimik ingerlaarsimanissartik naatsorsuutigaat.
Pituffik Space Base-miinneq pissarsiaqarfiulluarsimasoq, aammali inuilaarsuarmi kiffaanngissuseqarluni qimussimik angalaneq inuttut nukissanik tunisisartoq, kiisalu ilaqutariittut ataqatigiinnermik annertuumik pilersitsisartoq, ilaqutariit maannakkut suli Qaanaamiittut oqaatigaat.
Pituffimmiinneq pissarsiffiulluartartoq
Greenlandic Heritage Week Pituffik Space Base-mi ukiut tamaasa ingerlanneqartarpoq, taannalu Qaanaami nunaqarfiinilu innuttaasunit peqataaffigineqartarpoq. Aaqqissuussarlu assigiinngitsorpaassuarnik sammisassaqartitsiviusartoq peqataaffigiartorlugu Savissivimmiit qimussit katillugit arfinillit ulluni sisamani ingerlaarput. Olennguaq Kristensen, Naduk N. Kristensen ernerallu nukarleq qulinik ukiulik ataatsimut qimusserput, ernerisa angujullersaata 27-nik ukiullip nukkani inuussuttuaraq qimusseqatigaa, kiisalu ernerisa sisamaat 23-nik ukiulik aamma immikkut qimusserluni.
Greenlandic Heritage Week-ip ingerlanneqarnerani Qaanaamiit eqqaaniillu peqataasut Pituffik Space Base-imi akeqanngitsumik ineqartinneqartarput, piffissallu ilaani akeqanngitsumik nerisaqartinneqartarlutik. Piniartut sakkutooqarfimmi sulisunik ilalerlutik sukkaniutsinneqartarput, ukiorlu manna Olennguaq Kristensen sukkaniuttuni normu 2-julluni tikippoq. Aammattaaq peqataasut nammineq sanaaminnik, soorlu sanalukkanik amernillu tuniniaanissaannut periarfissinneqatarput, tassanilu sapakkanik kusanartuliat, teriannissat amii nannullu amia, Naduk N. Kristensenip tunivai.
Allaaserisaq tamaat Sermitsiami sapaatip-akunnerani saqqummersumi atuaruk, uani:
