Qaanaami Uummannamilu talittarfiliornerit

Qaanaami oqquiffissaq nunniugaq sanaartorneqaleruttorpoq, Uummannamilu talittarfiup pisariaqartinneqaqisup sanaartornissaa ukioq manna aallartinneqarnissaa naatsorsuutigineqarpoq.

Umiatsialivilunnera mallertarneralu pissutaalluni siusinnerusukkut umiatsiaaqqat nunap qaanut qallorneqartarput. Oqqiffissarlu nunniugaq suli piariinngikkaluartoq, umiatsiaaraatillit atorlualereerpaat.

Talittarfiit pillugit Inatsisartut inatsisaat 2015-mi atuutilertoq naapertorlugu sinerissami sumiiffinni assigiinngitsuni talittarfiliortiternissat naalakkersuisunit pilersaarutigineqarpoq. Talittarfiillu inuussutissarsiutit ineriartortinneqarnissaannut pingaaruteqarluinnartut Namminersorlutik Oqartussat, talittarfeqarfinnik piginnittuusut, isumaqarput.

Aviisi Sermitsiaq taama allappoq.

Namminersorlutik Oqartussat inuiaqatigiit akornanni annertuumik pisussaaffeqarput, taakkununngalu ilaavoq nioqqutissanik allanillu pisariaqartinneqartunik pilersuisussaatitaaneq. Minnerunngitsumik talittarfeqarnerup inuussutissarsiutinut, soorlu takornariaqarnermut, aalisarnermut ilaasunillu angallassinermut naleqquttuunissaat Namminersorlutik Oqartussat qulakkiigassaraat.

Talittarfiit pillugit inatsisip pilersinneqarnerata kingorna, ilaatigut Qaanaami nunniukkamik oqquiffissaliornissaq, Uummannamilu aalisartoqarfiusumi talittarfeqarnikkut ukioq manna annertuumik inerisaanissaq siunniunneqartunut ilaapput.

Qaanaami oqquiffissaq nunniugaq

Qaanaami oqquiffissamik nunniornissaq 2018-imi aallartinneqartoq, ukioq manna 2020-mi naammassineqarnnissaa naatsorsuutigineqarpoq, sanaartornerlu 33 millioner kroninik aningaasanik inatsisitigoortumik aningaasaliiffigineqarnikuuvoq. Qaanaami mittarfiliortoqarnerata kingorna aatsaat taamak annertutigisumik sanaartortoqaqqippoq. Qaanaami siornatigut umiarsualiveqarnikuunngilaq, umiatsiaaqqanulluunniit puttasunik talittarfeqarnikuunani. Taamaattumillu oqquiffissamik nunniorluni talittarfissaq, najukkami ataatsimiititaliaq suleqatigalugu pilersaarusiorneqarpoq, talittarfittaassarlu illoqarfimmut annertuumik iluaqutaajumaartoq naatsorsuutigineqarpoq.

Oqquiffissaq nunniugaq suli piariinngikkaluartoq, Qaanaarmi umiatsiaararsortunit iluaqutigilluarneqalereersimasoq, aalisartoq piniartorlu Jens Danielsen, aamma Inatsisartunut ilaasortaasoq, oqarpoq. Aammali sanaartukkap aalisarnermik inuussutissarsiuteqarnermut, ukiuni kingullerni annertuumik ineriartorfiusumut iluaqutaallualerumaartoq, taassuma naatsorsuutigaa.

Aviisimi Sermitsiami atuarnerusinnaavutit. Aviisi uani pissarsiariuk:

Powered by Labrador CMS