Qaanaami ukiassalereersoq
Aasareernerata kingorna Qaanaami aperiikatappoq
Nunatsinni illoqarfiit avannarpasinnersaanni Qaanaami innuttaasut marlunngormat iteramik sila apisimasoq takuaat.
Tassami unnuami centimeterinik tallimat missaanniittunik apisimavoq, tamanna Qaanaami meeqqat atuarfiata pisortaata Dan Normannip Sermitsiaq.AG-mut ilisimatitsissutigaa.
- Qaanaami taamaasinerani apisarnera qaqutigoortorsuunngilaq, siornatigut tamanna misigereerparput. Taamaattoq piffissap imaalinerani aatsaat taamak apitigitillugu takuara, oqarpoq.
Sila allanngorartoq
- Apereernerata kingorna ukiassalernera malunnarsivoq. Sila juulimi nuannerpoq, aasarilluni, nillerteriasaarporli. Apisimanera innuttaasunit alutorineqarpoq, assinik ikkussisoqattallaalluni Facebookimut, Dan Normann oqarpoq.
Aput peerutereersimasoq oqaatigaa.
- Taamaattoq qaqqat qaavi aputaannanngoqqapput, oqarpoq.