Kalaallit Nunaanni pissartanngorniunnerit arlallit sapaatip-akunnerini kingullerni ingerlanneqarput. Qaanaami innuttaasut 600-ngajaasut piffissami kingullermi arnat angutillu assammik arsarnermi nunatsinni pissartanngorniunnerannut malinnaasimapput.

Qaanaami assammik arsartartut siunissami pissartanngorniuttoqarneranut peqataanissamik takorluugaqarput. Illoqarfimmili timersortarfiup atortorissaarutaasa ajoquteqarnerat pssutigalugu, timersortarfimmik atuisartut ukioq kaajallallugu sungiusarnissamut periarfissaqarpallaanngillat, Masauna Peary Qaanaami innuttaasuusoq allapoq.

- Timersortarfipput ukiukku issittarneranut naleqqunnanilu mikivallaaqaaq. Pissartanngorniuttoqarneranut peqataasarusukkaluarluta ukioq naallaugu sungiusarsinnaasanngilagut, Masaana Peary Qaanaameersoq tusagassiorfitsigut nalunaaruteqarluni oqarpoq.

Masauna Pearyp oqaluttuaraa, timersortarfik sarfaliuuteeqqanit marlunnit septembarip qaammataaniit martsip qaammataata tungaanut kiassarneqartartoq. Timersortarfik aalajangersimasumik kiassaateqanngilaq, tamatumalu kinguneranik timersortarfik nillertupilussuusarluni.

- Isikkavut nillertittaqaat, sungiusarniaraangattalu tamakkiisumik kissassersinnaasarata. Aaamm sungiusareernermi pitsaasumik uffarfissaqanngilagut, taanna oqaluttuarpoq.

Pitsaanerusunik atugassaqartinneqarusuttut

Masauna Pearyp Qaanaami timersortarfimmik akulikitsumik atuisartup oqaatigaa, Qaanaami innuttaasut ukioq naallugu sungiusarsinnaasarumallutik pitsaanerusun ik atugassaqartginneqarusuttut. Ilanngullugu oqaluttuaraa, Qaanaami innuttaasorpassuit assammik arsarnermik soqutigisaqartuusut.

- Timersortarfeerarput Kitaata sineriaani illoqarfinni allani klubbit allat periarfissaqarnerannut sanillersuunneqarsinnaanngilluinnarpoq. Inatsisartut kommunilu kaammattorpavut, aningaasanut inatsisissamik missingersuutissanillu tullissaanik oqaluuserinnilerunik timersortarfitta allilerneqarnissaa eqqarsaatigeqqullugu, taanna allappoq.