Qaanaami serlersaarisoqarsimaneranut atatillugu politiit takunnittunik ujaasisut
Qaanaami mittarfinnut atortorissaarutit sapaatip akunnerata naanerani serlersaarneqarsimapput. Inuusuttuaqqat marluk serlersaarisoqarnerani sumiiffimmiissimasut politiinit maanna ujartorneqarput.
Qaanaami mittarfinnut atortorissaarutit eqqaanni inuusuttuaqqat marluk sapaammi maajip aallaqqaataani nal. 06.35 missaani takuneqarsimapput.
Mittarfinnut atortorissaarutit aserorterneqarsimasut kingorna paasineqarpoq, taamaattoqarsimaneralu politiit ilungersunartutut isigineqarpoq.
- Sapaatip-akunnerata naanerani Qaanaami mittarfinnut atortorissaarut, timmisartunik mittarfinnillu sumiissusersiuinermut atatillugu atorneqartartoq, aserorterneqarsimavoq. Suliarlu politiit ilungersunartutut isigaat atortorissaarutip aserorterneqartup timmisartunik isumannaallisaanermut pingaaruteqarluinnarmat, Kalaallit Nunaanni Politiit Facebookiminni allapput.
Suliami takussutissat ilisimannittutullu nalunaajaat malillugit Qaanaami inuusuttuaqqat marluk sumiiffimmi piffissamilu tassani takuneqarsimasut politiinit ujaarineqarput. Politiini pigaartut ilisimatitsipput angutit inuusuttuaqqat marluk ujarneqartut.
Angutit inuusuttut marluk ujarneqartut
- Taamaattumik inuit marluk takuneqarsimasut sapaammilu maajip aallaqqaataat 2022 nal. 06:35 missaani innuttaasut allat suliamut atatillugu takunnissimasut/tusagaqarsimasut politiinut attaveqaqquneqarput, politiit allapput.
Innuttaasut takunnissimasinnaasut tusaasaqarsimasinnaasulluunniit Qaanaami politiinut saaffiginneqquneqarput pigaartunulluunniit sianeqquneqarlutik uunga: 70 1448.