Qaanaami qilalugarniarneq nungusaataanngitsumik ingerlanneqartoq
Qaanaap eqqaani qilalukkat qernertat sumiiffinni allanut naleqqiullugit amerlanerupput, naatsorsuutigineqarporlu suli amerlanerulerumaartut. Pisassalli amerlineqassappata pitsaasuunngitsoq, biolog isumaqarpoq.
Qaanaami mattak kilomut 150 koruunilerlu Inughuit Seafoodimut tunineqartarpoq, taamaattumik Qaanaami piniartukkormiut inuussutissarsiutaannut qilalugarniarneq pingaarnerpaanut ilaavoq.
Aviisi Sermitsiaq taama allappoq.
Qilalukkat qernertat pisassiissutit julimmi nungupput, puisillu amiinut tunitsiveqanngilaq, sikukkullu qaleralinniarneq decmberimi aatsaat aallarteqqissalluni. Taamaattumik piniartukkormiunut inuuniarnikkut atugassarititaasut ilungersunartut pissutigalugit, Qaanaami qanittumi akerliussutsimik takutitsisoqarpoq, tassani Naalakkersuisut qilalugartassanik ilaseqqinnissaat anguniarneqarluni. Piniarnermut Aalisarnermullu Naalakkersuisoq Jens Immanuelsen (S), qilalugartassanik ilaseqqinnianngikkaluartoq, parteeqataa Karl-Kristian Kruse, aalisartuullunilu piniartuusimasoq, Qaanaami piniartut piumasaannut isumaqataalluni tapersersuivoq. Taamaatuttaaq Inatsisartut Aalisarnermut Piniarnermullu Ataatsimiititaliaanni ilaasortat amerlanerussuteqartut Qaanaami qilaluagartassat amerlineqarnissaat kissaatigaat.
Nungusaataanngitsumik piniarneq
Qaanaami qilalugartassiissutit ukiuni kingullerni amerlasuuni pitsaasunik nakkutigineqarlutik ingerlanneqarsimasut, Pinngortitaleriffimmi miluumasut timmassallu pillugit immikkoortortaqarfimmi pisortaq, Fernando Ugarte oqarpoq.
Qaanaap eqqaa Qimusseriarsuarmiit qilalugaqarnerunera siusinnerusukkut qilalugaqassutsimik misissuisarnerit takutippaat.
Qilalukkat piniarneqartarnerinik killilersuineq, qilalukkat amerliartulernerannik kinguneqarsimasinnaasoq, biologip ilimagaa. Naak qilalukkat qernertat piniarneqartaraluartut, aamma silaannap allanngoriartorneranik imaatigullu angallannikkut akornusersorneqartaraluartut, taamaattoq Qaanaami qilalugarniarneq peqassutsimut akornutaanngitsumik ingerlanneqartoq, Fernando Ugarte oqarpoq. Qilalugaqassutsimilli misissuisoqaqqaartinnagu pisassanik ilasinissaq isumatusaarnerusorinngilaa.
Aviisimi Sermitsiami, uani ataani pissarsiarisinnaasarni, atuarnerusinnaavutit: