Qaanaami kinguaassiutitigut atornerluisarneq paqumigineqartoq

Kinguaassiutitigut atornerluisarnerit Qaanaami suli oqaluuserinissaat ajornakusoorpoq. Meeqqat illersuisuata Aviâja Egede Lyngep juunimi illoqarfik tikeraaramiuk tamanna misigaa.

MIO kinguaassiutitigut atornerluinerit pillugit saaffigineqarpoq, kisianni taakku ilaminiinnarigaat naliliipput.

- Atorfillit akornganni pasinnittoqarpoq kisitsisit amerlassasut, pisortatigoortumillu kisitsisit takutitsinerannit meeqqat amerlanerusut kanngutsaatsuliorfigineqartartut. Ilisimatitsissutigineqarpoq kinguaassiutitigut kanngutsaatsuliortarnerit paqumigineqartorujussuusut. Kanngutsaatsuliortoqarneranik pasitsaassilluni nalunaarutiginninnerit politiinut unnerluussutaaneq ajorput, ilisimaneqarluarporlu nalunaarutiginninnerit kingunerisigut iliuuseqarfigineqarneq ajortut, MIO-p Qaanaamiinneranit nalunaarusiami tamanna oqaatigineqarpoq.

Kisitsisit nalunaarsorneqanngitsut atorfillit naliliinerat nikerartorujussuusinnaasoq, tamatuma saniatigut MIO-p paasivaa. Kisianni kisitsisit nalunaarsorneqanngitsut amerlasinnaanerannik paasissutissaq ataaseq tikkuussivoq: Inersimasut arlaqartut meeraanerminni atornerlunneqarsimasut kingunerlutsitsisut amerlasut atorfillit oqaatigaat.

Inuiaqatigiinnguit ikitsunnguullutik imminnut nakkutigisorujussuummata imaaliaallaannarlu qimanneqarsinnaannginnerat, paqumiginninnerujussuarmut tunuliaqutigineqartoq nalilerneqartarpoq.

Paqumigisap paquminarunnaarsinneqarnissaa anguniarlugu ataatsimoorussamik suliniuteqarnissaq Qaanaarmiut innersuussutigaat. Tassani Qaanaami pissutsinut tulluarsakkat paasissutissiinermi periuserineqassapput.

MIO-p aammattaaq innersuussutigaa, kinguaassiutitigut atornerlunneqarsimasut amerlassusaat nalunaarsorneqassasut, kiisalu najukkami upalungaarsimasunik atornerluisoqarneranik pasilliuteqartoqartillugu qisuariarsinnaasunik pilersitsisoqassasoq.

Imigassaq aamma naamaarneq

MIO-p Qaanaami tikeraarnermini atuarfimmi sammisassat peqqinnartut peqqinnanngitsullu aamma meeqqanut oqaluuseritippai. Peqqinnanngitsut akornanni qinngasaarineq, hash, sprit, vin aamma immiaaqqat meeqqat taagorpaat.

- Imigassaq spritilu eqqartorneqalermata nipaalluinnalerpoq. Aperisoqarmallu imigassaq spritilu imerneqartarnersut ataatsikkut akisoqarpoq ”Assorujussuaq”, MIO-p Qaanaami tikeraarneranit nalunaarusiami tamanna allaqqavoq.

Naak imigassamik atornerluineq siulianut sanilliullugu takussaajunnaariartortutut nalunaarutigineqartaraluartoq, meeqqat suli ajornartorsiutitut isigaat.

Liimmimik ikitsisip gassianik aamma naamaarneq meeqqat namminneq ajornartorsiutigaat.

- MIO soorlu meeqqanut kanngutsaatsuliortoqartarneranut atornerluisoqartarneranullu nalunaaruteqartoqarneranut ernummateqarnermisulli aamma spritimik, hashimik allanillu soorlu liimminik naamaartoqarlunilu muskatinik atornerluisoqarneranut tunngatillugu aamma ernumassuteqarpoq.

Hash ajornartorsiutaalersimaqaaq, Ilulissaniit eqqussinissaq ajornanngeqimmat, misissuisoqarneq ajormat. Atuartut angerlarsimaffianni siorna nassaartoqarsimavoq liimminik naamaartoqarsimaneranik hashitortoqarsimaneranillu takussutissanik.

- MIO-mit innersuussutigineqarpoq… pinaveersaartitsineq, ilinniartitaaneq aamma katsorsarneqarnissamut periarfissiinerit, aamma atornerluisunut inuusuttunut tulluarsakkat eqqumaffigineqassasut. Atornerluisunut katsorsaanerit arlalitsigut pissapput, aammali ilaqutariit tamakkiisumik peqqinnerat aamma inersimasut kanngutsaatsuliorfigineqarsimasut atornerlugaasimasullu kingunerlutsitsisut ikiorserneqarnissaat pisariaqarpoq, nalunaarusiami tamanna allaqqavoq.