Qaanaami inuit innarluutillit peqatigiiffiata Tilioq taperserpaa
Qaanaami inuit innarluutillit peqatigiiffittaavata Tiliup angalanermini nalunaarusiaa tapersersorpaa. Nalunaarusiami inuit innarluutillit sullinneqarnerisa pitsaannginnerat ersersinneqarpoq.
Qaanaami inuit innarluutillit peqatigiiffiata Tiliup angalanerminit nalunaarusiaa "Tilioq Avani" isumaqatigilluinnarpaa.
- Kinguneqarluarnissaa naatsorsuutigivara. Neriuutigalugulu inuit innarluutillit atugarissaarnerulernissaanik kinguneqassasoq, tassa paasinarsissaaq iluamik ingerlatsisoqalissanersoq, Korna Nielsen, inuit innarluutillit peqatigiiffianni siulittaasoq oqarpoq.
Korna Nielsen Tiliup nalunaarusiani saqqummereernikuuvoq. Taanna inersimasumut innarluuteqartumut anaanaavoq. Ernera suli angajoqqaamini najugaqarpoq, Qaanaami tulluartumik allami najugaqarfissaqannginnami.
Angalaneq iluaqutaalereerpoq
Korna Nielsenip maluginiarpaa Tiliup Qaanaamut majimi 2020-mi angalanera iluaqutaalereersoq. Naak nikeriartoqarnera kingaattutut isigineqarsinnaagaluartoq:
-Assersuutigalugu inuk innarluutilik ikortartorteqarnissaa pillugu kommuni septemberip aallartinnerani piffissaq sivikinnerpaaq atorlugu ujaasissalluni ilisimatitsivoq, oqarpoq nangillunilu:
- Kisianni suli tuttaqanngillat. Oqaraluarput pilertortumik ujarlissallutik, Korna Nielsen oqarpoq.
Allannguinissamut piareersimasut
KNIPK, nuna tamakkerlugu inuit innarluutillit peqatigiiffiisa kattuffiat, Qaanaamut junimi angalavoq peqatigiiffimmik pilersitsisoqarnissaanut ikiuukkiartorluni.
Peqatigiiffimmi siulersuisut ilaasortanik qaammatikkuutaartumik ataatsimiisitsisalerniarpoq, illoqarfimmi aaqqitassat ineriartortinneqarneri malinnaavigiumallugit. Angalanermit nalunaarusiaq siulersuisunit aamma ataatsimiissutigineqartussaavoq.
– Siulersuisut isumaat aamma tusarusunnarput, Korna Nielsen oqarpoq.
Avannaata Kommuniani borgmester Palle Jerimiassenip inuit innarluutillit peqatigiiffeqalersimanerat nuannaarutigaa:
- Uagummi Ilulissaniit Nuummiilluunniit ajornartorsiutinik tikkuartuiinnarsinnaanngilagut. Najugaqartut ajornartorsiutinik aaqqitassanillu tigussaasunik oqariartuuteqartarnissaat. Ajornartorsiutit aaqqiissutissallu takutissinnaappatikkit, taava uanga ingiaqatigikuttuussuakka, Sermitsiaq.AG-mut oqarpoq.