Atualerneq
Qaanaami atualeqqaartitsineq
Silagissorsuup ataani illoqarfiit avannarlersaanni, ullaap-tungaa nalunaaqutaq qulinngortoq Qaanaami atuarfik atualertitsivoq. Atualertut katillugit 13-it alutornarluinnartunik Qaanaarmiutoorlutik atualerput
Angajoqqaat, aanaa aataakkut ilaquttallu atuarfiup silataani, silagilluinnartumi katersuuttoralugit atuarfiup pisortaata Dan D. Normannip kiisalu atualerlaat ilinniartitsisussaat tikilluaqqusisuupput.
Atualerlaanit 13-iusunit nukappiaqqat tallimaapput niviarsiaqqallu arfineq-pingasuullutik. Atualerlaat Qaanaarmiutut alutornarluinnartunik 'arnanoortulerlutik' 'angutinoortulersorsimasut' (Piniartut qarlii, nannup amianik sanaat) takoranneqisut tassani tikilluaqquneqarput.
Atuarfiup pisortaata tikilluaqqusilluni oqalugiarnermini immikkut maluginiaqquaa, atuarfiup angerlarsimaffiullu akornanni suleqatigiilluarnissaq. Angajoqqaallu atualertoortut eqqaasillugit, namminneq qanga atualeqqaarnerminni puigunaassimaqisumi ullorsiorsimanertik eqqarsaatigissagaat, tassani ullumikkut atualertuutiminnut puigunaatsumik ullup atornissaa eqqarsaatigalugu. Eqqaamassagaallu meerartik ullumikkut tulluusimaarutaanerat.
Pisortap oqalugiareernerata kinguninngua, angajoqqaat aanaa aatakkullu nipitik 'Pagaa!' illugalugit aningaasanik silaannarmut qummut naloriussuipput, najuuttunit ussagarneqarluartumik.
Tamannalu naammasisoriniarlugu avataaniit aperisoqartalerpoq, aningaasanik naloriussaasunit immikkut ilisarnaaserneqarsimasunik nassaartoqarsimasoralugu. Immikkuullu ilisarnaaserneqarsimasunik nassaartut aningaasanik pappiaqqanik immikkut amerlassusilinnik tunissutissarfigineqarput, tamanna Qaanaarmiut ileqqoraat.
Pilersuisoq A/S atualerlaanut tamanut, taquaasivinnik nerisassanik imalinnik tunissuteqarfigineqarput. Taakkua qallunaat nunaanni nerisassanut pilersuisunit suleqatiginerisigut piviusunngortinneqarsimavoq.Suleqatigineqartut ilaatigut tassaapput: Kellogs, Sun top aammalu Schulstad. Suliffeqarfiillu tunissuteqartut immikkut qulequtsiussimavaat, nerisassat peqqinnartut.
Atuarfik arnaannarnik anguartilik
Qaanaamilu ilinniartitsisut immikkut maluginiagassartaqarput, tassami ilinniartitsisut qanimut qimerluualaaraanni. Ilinniartitsisuutut tamavimmik arnaannaviupput. Tamannalumi pisortap oqarneratuut nalaatsorneriinnaanngilaq.
- Aappi ukiuni kingullerni maanga Qaanaamut angutit ilinniartitsisut atorfinikkusuttut pissarsiarinissaat ajornarsiartorsimavoq. Akissutissartaa nalunngikkaluarukku erngerlunga akissagaluarpakkit, peqqutaasorli ilisimanngilara.
Nangillunilu:
- Naluaralu sooq angutit ilinniartitsisut Qaanaamut suliartorusuttannginnersut. Siunissarlu ungasinnerusoq eqqarsaatigalugu, tamanna qanoq iliornikkut aaqqiivigineqassanersoq ilisimanngilara, sulimi tamanna eqqartornikuunnilarput, Dan D. Normann atuarfiup pisortaa oqarpoq.
Qarasaasiat nutaat
Dan D. Normannillu ilanngullugu oqaluttuaraa, atuarfimmut nutaarsiassaq nuannerluinnartoq. Tassami atuarfik Nuna Fondiminngaanniit ipadinik nutaarluinnarnik 13-inik pissarseqqammerami, taakkua umiarsuarmut tullermut.
Tassalu ukioq manna kingullerpaamik Qaanaamut tikittussamut ilaallutik 28. august tikisinneqassammata. Taakkuunnaanngillalli, tassami Pituffimmi suliniaqatigiiffik 'Operation Julemandimik' taasaq qarasaasianik 15-inik kiisalu angallattakkanik 13-iusunik atuarfimmut tunissuteqaqqammersut oqaatigaa.
Qaanaami atualeqqaartoqarneranit assit uuma ataani takukkit