silarlorujussuartoq

Qaanaami anoraasuarsuaq: - Tupinnaqaaq

Erngup aqqutai qaararput, containerit uppikapput sikuerlunilu

Qaanaami anorersuarujussuarmat sikuerpoq

Qaanaami ukiukkut silarlussiorneq naliginnaavoq. Ippassarli anoraasuarsuallarmat silarluttarneranit sakkortuneruvoq.

- Ingasalluinarpoq, atuarfiut pisortaa Dan D. Normann Sermitsiaq.AG-mut oqarpoq.

Silap nillertipiloornerata kinguneranik illoqarpassuit imermut aqqutai qaararput. Nillertinneralu ilutigalugu anorlilipiluulerluni.

- 36-nik issippoq niaqorlu anissagaanni oqorsarluaqqaagassaalluni. Qiianarsuaarpoq, Dan D. Normann oqarpoq.

Erngup aqqutai innarlerput

Silarlunnerata kinguneranik atuartitsinissaq taamaatiinnartariaqarsimavaa. Meeqqallu ullumi atuariartoraluartut aamma angerlatitaasimapput.

- Atuarfimmi erngup aqqutai qaararsimammata atuartitsinissaraluaq taamaatiinnartariaqarparput. Sila issigaarmat illoqarfimmi amerlasuut erngup aqqutai qerillutit qaararsimapput. Ruujorilerisorpullu ataasiinnaammat suliarineqarnissaanut utaqqinassaaq, atuarfimmi pisortaq oqarpoq.

Timersortarfik silarlunnerani qalia innarlersimasoq aamma oqaatigaa. Qalia kusermat matusariaqarsimavoq.

Sikuerpoq

Pingasunngormat anoraasuarsuaq sakkortungaarmat siku sequmissimavoq.

- Aap, siku tinnguppaa. Inissisimaffiinit siku sequmittoq isiginnaarpara piniartut piniariarsinnaajunnaarlugit. Tassami qimussimik piniariartaramik, Dan D. Normann oqarpoq.

Nabot containerii tinnguttut takusinnaasimallugit aamma oqaluttuarpoq.

- Matuata saanut uppippoq, ungaluusaqarmalli isersinnaallunilu anisinnaavoq.

Anoraasuarsuarnerani sila ersittueruppoq ullut akornini takussaasoqarpiarunnaarluni.

- Ersernerluttorujussuuvoq maannulu aput illoqarfimmi qattuninngortiteqqavoq, Dan D. Normann oqaluttuarpoq, anorilu sakkukillereernerarlugu eqqissisaalluni.

- Maannakkut anoreqanngilaq, atuarfimmi pisortaq naggasiivoq.

Powered by Labrador CMS