Qaanaami angajoqqaat ikioqqunerat: Meeqqanit sumiginnaanertik ilisimavaat
Meeqqat illersuisuata Aviâja E. Lyngep ilaqutaariit sanngiitsumik inissisimasut Qaanaami naapippai, taakku meeqqat ikiornissaannut sakkussanik ujartuipput. Tamatuma saniatigut illoqarfimmik
Angerlarsimaffik ’nereqatigiiffiusoq. Toqqissisimasumik najugaqatigiilluni. Imminut iluamik pissusilersorfigaluni.’ Nukappiaraq Qaanaameersoq meeqqat illersuisuata illoqarfik juunimi tikeraarmagu taama oqapoq.
Angalanermit nalunaarusiamit saqqummeqqammersumi atuarneqarsinnaasutut, meeqqaat illoqarfimmiittut tamarmik taamaattumik najugaqanngillat.
- Ilanngullugu erseqqissassallugu pingaaruteqarpoq, Qaanaami sanngiitsunik meeraqarlunilu ilaqutareeqarmat, piaartumik annertuumillu ikiorneqarnissaminnik ikorfartorneqarnissaminnillu pisariaqartitsisunik, nalunaarusiami taama inerniliisoqarpoq.
Sakkussanik ujartuisut
Ilaqutariit meerartatik pitsaanerusumik angerlarsimaffeqartikkusuppaat, inuunertilli ajunngitsumut saatillugu allannguinissartik naluinnarpaat.
- Aammali erseqqissassallugu pingaaruteqarpoq, ilaqutariit meeqqaminnik sumiginnaagaangamik naluneq ajoramikku meeqqaminnik sumiginnaallutik. Taakkualu imminnut ikiorsinnaanissaminnut sakkussaminnik ujartuipput, imminnut meeqqaminnillu ikiuisinnaanngorniassagamik. Taakkuali siunnersorneqarnissaminnut ilitsersorneqarnissaminnullu saaffigisinnaasaminnik amigaateqarlutik misigisimasarput, tassani oqaatigineqarpoq.
Imigassaq, aningaasanoorneq, hash, naamaarneq, kinguaassiutitigut kanngutsaatsiliorneq aamma nakuuserneq Qaanaami meeqqat ajornarsiutaasut ilaattut oqaluttuaraat.
Soqutiginninneq annertooq
Tamatuma saniatigut meeqqat illersuisuata Aviâja Egede Lyngep meeqqat pisinnaatitaaffiinut soqutiginnittoqarnera misigaa, aamma nukissat aaqqiissutissanut ilaasinnaasut.
- MIO sumiikkaluaraangamiluunniit tikilluaqqusaangaarlunilu meeqqat pisinnaatitaaffii kinguaariinnit tamanit soqutigineqaqisut malugigatsigu. Qaanaami innuttaasut arlallit aqqusinermi unitsilluta inussiarnisaartumik soqutiginneqalutik apersortarpaatigut, nalunaarusiami tamanna oqaatigineqarpoq.
- Taamaattoqarnera inuppalaarnerujussuartut MIO’miit paasineqarpoq, tassa ilaqutariit tamarmik Qaanaarmiullumi tamarmik kissaatigaalugulu takutippaat meeqqat pillugit pitsaanerpaamik angusaqartoqarusullunilu iliuuseqarusuttoqartoq.
Sapaatip-akunnerata siuliani MIO-p angalanermut nalunaarusiaq pillugu Avannaata Kommuniani kommunalbestyrelsimut isumasioqatigiitsitsivoq.