Qaanaami aalisartoq: Ukiumut katersat silapiluttaarneranut naammanngerujussuarput
Qaanaami aalisartoq, Nuka Kristiansen, ilaquttanilu aningaasaqarniarnikkut angummanniapiloorput. Kiisami sikusimalermat siunissaq pitsaanerusutut isikkoqalerpoq.
Nuka Kristiansen Qaanaami aalisartuuvoq. Juni 2022-mili aalisarami, silap allanngorarnera, sikuniapiloorneralu pissutigalugit aalisarsinnaasimanngilaq. Kingullermik aningaasanik isertitaqarami, oktoberimi qilalugaqataanermini isertitaqalaarpoq.
- Maannamut suli isertitaqanngilanga Qaanaamilu aalisartoqaterpassuakka aamma isertitaqannginnerpaapput. Novemberimi sikugaluaratta aalisarlunga allartillualerlutalu silarsuup nukissuisa piliaanik siku aserorterami aalisarfigisartagarput anorlertaaginnalerluni, suli aalisarfinngunngilaq, Nuka Kristiansen oqaluttuarpoq.
Nuka Kristiansenimut nutaajunngilaq silapilutsillugu sikkorlutsilluguluunniit aalisariarani angerlarsimaannarnissaq.
Aatsaalli taama silap atoruminaannerujussua maluginiarlugu, Sermitsiaq.AG-mut oqaluttuarpoq.
- Qaammatit isertitaqarfiunngitsussat ilanngullugit isertitaqarniartarpunga, qaammatit uninngaffiusuni akiligassanut angummassinnaaniarluta. Januarimiit juni tungaanut katersakka aasakkut atorneqarput, aalisarfinngornissaatalu tungaanut naammanngitsoorlutik, Nuka Kristiansen oqarpoq.
Pingajussaat itigartinneqartoq
Qaanaap eqqaa sikoqqammerpoq, Nuka Kristiansenilu aalisarnerminik aallartitseqqilersimalluni. Sulili tunisinngilaq, taamaammallu suli isertitaqarani. Ullunili qaninnerni tunisinissani naatsorsuutigaa.
Ilaqutariit, tassa ataata, anaana, meeqqallu pingasut, anaanaasup erninermut atatillugu sapaatit akunneri marlukkaarlugit 1.500 koruuninik tigusartagaqarneranik inuuniuteqarput.
- Ilungersunaqaaq isertitaqaavinnani, maannamut aappap kisimi pilersuinera sakkortulaarpoq. Qujassutissaanerpaapput ilaquttat ikiuummata amigartoorutitsinnik tunisarmatigut, kisinannili ajuusaarnarpoq taamannaannaq ikiorneqarneq inersimasuulluni nalunagu pilersuisinnaalluni, oqarpoq.
Taanna ilisimatitsivoq kommunimut pingasoriarluni ikiorsiissutinik noqqaalluni qinnuteqartarsimagaluarluni. Pisortanit ikiorsiissutinik qinnuteqarnerit tamarmik itigartitsissutigineqarsimapput. Nuka Kristiansen oqaluttuarpoq oktoberimi qilalugaqataasimaneranit isertitaqarsimanera itigartitsinermi tunngavilersuutigineqarsimasoq.
Nuka Kristiansen Sermitsiaq.AG-mut ilisimatitsivoq oktoberimi qilalugaqataagami 7.000 koruuninik isertitaqarsimalluni. Pisortanit ikiorsiissutinik qinnuteqaqqinnissamut kajuminnginnerarpoq.