unioqqutitsilluni raajarniarneq
Qaammataasap Royal Greenland paasisaatikkaa
Unnerluussisut Royal Greenlandillu eqqartuussut uissuumminartoq ukiuni sisamani suliarineqarsimasoq suliareqqitassanngortippaat
Royal Greenland suliffeqarfiullu aalisariummi naalagaa savalimmiormioq Qeqertarsuup avannaani aalisarfigeqqusaanngitsumi kinguppanniarnermut pineqaatissinneqarput.
- Eqqartuussineq juulimi pivoq. Royal Greenland 0,5 million koruuninik akiliisussatut pineqaatissinneqarpoq. Umiarsuup naalagaa 10.000 koruuninik akiligassinneqarpoq. Saniatigut unioqqutitsilluni pisat 1,5 million koruuninik naleqartut arsaarinnissutigineqarput, Kalaallit Nunaanni Politiit inatsisilerinermut immikkoortuani unnerluussinermi fuldmægtig Ander Fischermann AG-mut oqarpoq.
Nangilluni oqaatigaa eqqartuussut unnerluussisoqarfimmit eqqartuussivimmut qaffasinnerusumut suliareqqitassanngortinneqartoq sakkortusineqarnissaa piumasarineqarluni.
Aamma taamatut nalunaarput Royal Greenlandip aqutsisui.
- Eqqartuussut isumaqatiginnginnatsigu suliareqqitassanngortipparput. Suliarlu ingerlammat annerusumik oqaaseqarfiginian- ngilara, Royal Greenlandimi pisortaaneq Mikael Thinghuus oqarpoq.
Suliaq sivisuumik ingerlanneqartoq
AG-mi paasisat malillugit unioqqutitsineq oktobarimi 2012-imi pivoq Royal Greenlandip kilisaataataasa ilaat unnerluussutaaqqaartup oqaasertai malillugit sinerissap qanittuani inatsisinik unioqqutitsilluni Harekarsip eqqaani kinguppanniarmat.
Kilisaatip sumiinnera pillugu GPS-imit paasissutissat pillugit aaqqiagiinngittoqarsimavoq, paasissutissallu umiarsuup nalunaarsuivianut allanneqarsimasut peqqutigalugit oqartussaasut pasitsassimapput.
Allaaserisaq tamaat AG-mi uani sapaatip-akunnerani saqqummertumi atuaruk, ilaatigullu Aalisarnermut Naalakkersuisoqarfiup akiligassaq annertusinissaanut eqqarsaatersuutai paasillugit