Qaammammut 4.500 koruunit
Piitsuunerpaanut inuuniarnermi atugassarititaasut peqqarniitsut qineqqusaaleruttornerup nalaani politikkikkut oqaluuserisassanngortinneqalerput. Pissakinnerpaanut tunngaviusumik akigititaq »kaannermik ujariatsinermillu« isumaqartoq, politikeri oqarpoq.
4.760-it.
Innuttaasut taama amerlatigisut Naatsorsueqqissaartarfimmi naatsorsuinerit kingulliit naapertorlugit pisortanit ikiorsiissutinik pisartagaqarput. Allatut oqaatigalugu qinersisartut ikigisasssaangitsut, aammali piitsuusut, isumaginninnikkut naligiinnginnerup alliartuinneranik avataanit misigisaqarsimasut, AG allappoq.
Taakkununnga atugassarititaasut siunissami qanoq ittuujumaarnersut immaqa »Pisortanit ikiorsiissutit pillugit Inatsisartut inatsisissaannut siunnersuut«-mit ilaatigut aalajangiivigineqarsinnaapput, taannami qanittukkut tusarniaassutigineqarpoq. Tassanilu § 22 maluginiarnartuuvoq:
– Tunngaviusumik akigititaq qaammammut 4.500 kr.-uvoq. Tunngaviusumik akigititaq ineqarnermut, aningaasartuutinut aalajangersimasunut allanngortartunullu kiisalu nerisassanut atisanullu aningaasartuutit akilernissaannut ilaavoq, paragraffimi allassimasoqarpoq.
Aningaasat taama annertussusilerneqarsimanerat tusarniaanerup nalaani politikerinit Qeqqatalu kommuniani atorfilittanit tupigusuutigineqarpoq.
Kaanneq ujariatsinerlu
– Kommunip takujuminaatsippaa, qanoq ililluni tunngaviusumik akigititat 4.500 koruunit qaammammut aningaasartuutinut aalajangersimasunut allanngorartunullu soorlu ineqarnermut akiliutinut, nerisassanut, atisassanut allanullu ullumikkut Kalaallit Nunaanni akit eqqarsaatigissagaanni tamanut matussusiisinnaanersut. Qeqqata Kommuniata tamatumunnga atatillugu paaserusuppaa, Naalakkersuisut tunngaviusumik akigititanik naatsorsuinerminni tunngavissanik sunik atuisimanersut, kommuni tusarniaanermut akissutimini allappoq.
Pisortanit ikiorsiissutinik tigusisartut ineqarnermut tapiissutit aqqutigalugu ineqarnermut aningaasartuutit ilarpaalussuinik nalinginnaasumik aamma matussusiititsisassapput. Tamatumalu saniatigut tapinik arlalinnik, qaavisigut pissarsiarineqarsinnaasunik, soorunami aamma meeraqataanni tunniunneqartartut immikkut, paasissutissani quppernermi matumaniittumi takutinneqartutut. Taamaakkaluartoq politikerit arlallit, AG-p attaveqarfigisimasaasa, akigititap qaffasinnerunnginnera naammaginngilluinnarpaat.
Allaaserineqartoq aviisimi AG-mi, ullumi pingasunngornermi saqqummertumi, tamakkiisumik atuarneqarsinnaavoq. Aviisi uani pisiariuk: