Oqaloqatigiinneq

Putinip Kielsen qaaqquaa

Kim Kielsenip (S) ippassaq unnukkut Reykjavikimi russit aallartitaat oqaloqatigai

Naalakkersuisut siulittaasuata Kim Kielsenip (S) præsident Putinip issittumi aallartitaa Arthur Tjilingarov oqaloqatigigaa

Issittoq pillugu ataatsimeersuarnermi Arctic Circlemi, ullumi Reykjavikimi ammarneqartumi, attaveqaqatigiinnerit nutaat pisortatigoortumik pisortatiguunngitsumillu pilersinneqarput.

Taamaasilluni Naalakkersuisut siulittaasuat Kim Kielsen (S) Ruslandimit assammik isaatsivigineqarpoq.

Putinip ikiortigilluagaa angalaqatigalugu

Kielsen qaaqquneqarpoq russit sikutarsuarmi ilisimatusarfiata takuniarnissaanut, taannalu 2016-imi Qalasersuarmut ´angalassaaq´- soorlu russit ilisimasuut ukioq manna Qalasersuarmit Kalaallit Nunaannut taamatut angalasimanerattut.

Qaaqqusissummik apuussivoq russeq issittumi ilisimasassarsiortartoq nunarsuarmi tusaamasaq Putinillu issittumut tunngasunut sinniisua Arthur Tjilingarov.

Taanna aamma 2007-imi Qalasersuarmi immap naqqanut russit aqqartartumik erfalasuliineranni tusaamaneqartumi peqataasimavoq.

Allaaserisaq nalunaaqutaq 7:25 naqqinneqarpoq. Aallaqqaammut tusarneqaraluarpoq Kim Kielsen qaaqqussissummut qujasimavoq. Namminersorlutilli Oqartussat tamanna suli isummerfigisimanngilaat.

Powered by Labrador CMS