Putinip Issittumi nunap killingi ukkatarigai
Ruslandimi Sillimaniarnermut Siunnersuisoqatigiit ataatsimiinnissaat sioqqullugu, Qalasersuup eqqaani nunap toqqaviinut piumasaqaatai ataatsimiinnermi oqaluuserineqassasut Putinip tallimanngornermi oqaatigaa.
Russit præsidentiata Vladimir Putinip tallimanngornermi taama oqariartuuteqarnera nunani tamalaani tusagassiorfiit arlallit ilanngutassiaraat.
Ruslandimi sillimaniarnermut siunnersuisoqatigiit ataatsimiinnissaat sioqqullugu Qalasersuarmi Ruslandip piumasaqaataannik Putinip ukkatarinninnera issuarneqarpoq:
- Suleqatit, ullumikkut qulequttat pingaarutillit arlaqarput, nunatsinnut oqaluuserisassanut tunngatillugu aamma Ruslandip nunataata Issittup Imartaani toqqaviinut apeqqutinut tunngatillugu. Aallartinniarta, Kremlip nittartagaata Putin taamatut oqaaseqartoq issuarpaa. Nutaarsiassaqartitsivik Reuters taama allaaserisaqarpoq.
Ruslandip Ukrainemut saassussinerata kingorna russit præsidentiata oqariartuutai immikkut maluginiarneqalerput.
Reutersip ilanngutassiaa naapertorlugu nunat toqqaviannik piumasaqaateqarnermut tunngatillugu Putinip sunarpiaq oqaluuserineqassanersoq pineraa, Kremlimi erseqqissumik oqaatigineqanngilaq, kisianni atorfilittat qaffasissumik atorfeqartut arlallit, illersornissamut ministeri Sergei Shoigu aamma nunanut allanut isertortumik paasiniaasartut pisortaat, Sergei Naryshkin, ataatsimiinnermut peqataasimapput.
Forsvarsakademietimi Issittumi Sillimaniarneq pillugu Ilisimatusarfimmi adjunkt, Marc Jacobsenip, Putinip oqariartuutaa atuarpaa, nunallu toqqaviat pillugu apeqqutip siunnersuisoqatigiinni oqaluuserineqarnera tupaallannartortaqanngitsoq, taassuma Sermitsiaq.AG-mut oqaatigaa.
Marc Jacobsenip oqarnera naapertorlugu, Issittumi nunat killingi pillugit aalajangersimasut suut oqaluuserineqarnerat aalajangiisuussaaq, maannamullu tamanna Kremlimit ilisimatitsissutigineqanngilaq.
Qalasersuup eqqaani immap naqqanut piginnittuunermut Rusland FN-imut piumasaqaateqarnikuuvoq, Kunngeqarfik Danmark aamma Canada sumiiffimmut FN-imut piumasaqaateqarnikuupput.