Punneq makkariinalu 15 procentinik qaffariarput
Pisiassat inuussutissanut tunngasut ukiup ataatsip ingerlanerani akitsoriartorput. Atuisunut akit tamarmiusut ukiup ataatsip ingerlanerani 2,7 procentinik qaffariarsimasut, Naatsorsueqqissaartarfimmit kisitsisit nutaat takutippaat.
Ukiumi kingullermi pisiniarfinni pisiassanik inuussutissanik pisiniarneq akisunerulerpoq.
Akit qaffariarneri pillugit kisitsisit nutaat – aningaasat naleerukkiartornerannik aamma taaneqartartut – takutippaat, pingaartumik nerisassat akitsorsimasut.
Punneq, makkariina allallu akitsornerpaallutik ukiup ataatsip ingerlanerani 15,1 procentinik qaffassimapput. Naatsorsueqqissaartarfik atuisunut akit ineriartorneri pillugit saqqummersitami taama ilisimatitsivoq.
Immikkoortuni 'immuit, immuit qalipaat, immussuit, manniit' aamma 6,7 procentinik qaffariartitseqataapput.
Akit naleqqersuutaat 2,7 procentinik qaffariartut
Naatsorsueqqissaartarfiup kisitsisit 1. januar 2023-mi naatsorsorlugit ukiup siulianut ullormut tassunga sanilliuppai.
Akit naleqqersuutaannik taaneqartartumi katillugit 2,7 procentinik qaffariaateqarput. Immikkoortuni tamani qaffariartoqarpoq, kisianni nioqqutissat inuussutissat qaffariarnerpaapput.
Atuisunut akit naleqqersuutaat atuisut tamakkiisumik atuinerisa agguaqatigiissinnerannik uuttuuteqarnera eqqumaffigissallugu pingaartuusoq, Naatsorsueqqissaartarfik allappoq.
- Taamaasilluni nioqqutissaqarfinni ataasiakkaani akit tamakkerlutik allannguutaat akinut naleqqersuummut tamakkiisumut annertunerusumik sunniuteqarsinnaanngillat, soorlu atuisut ataasiakkaat aamma akit allanngornerat allatut misigisinnaagaat, atuisut namminneq qanoq atuisarneri apeqqutaalluni, Naatsorsueqqissaartarfik allappoq.
Taamatuttaaq Naatsorsueqqissaartarfiup eqqumaffigissallugu 1. januaarimiit 1. juulimut akit qanoq inissisimanerat naleqqersuummi takutinneqarmarnerat eqqumaffigeqquaa.
Ukiup affaanut naatsorsuutit isiginiaraanni akit qaffariarnerat 2022-imi ukiup affaanit siullermut sanilliullugit appariarput.
Atuisunut akit ukiup affaani kingullermi, piffissami 2022-mi juulimiit 2023-mi januaarimut 0,9 procentimik qaffassimapput. 2022-mi ukiup affaani siullermi akinut naleqqersuut qaffariarneruvoq – tassa 1,8 procentit missaanni. Titartakkami uani ataani takuneqarsinnaavoq:
Assersuutigalugu Kalaallit Nunaat Danmarkimut sanilliullugu appasissumik akinik qaffaaffiusimavoq. Danmarkimi aningaasat naleerukkiartornerat februaarimi 7,6 procentimut naatsorsorneqarsimavoq.
Uani titartakkami nunatsinni nioqqutissat assigiinngitsut akit qaffannerannut tapertaanerat takutippaat, tassanilu inuussutissat qaffariarnerpaapput:
