Pujortuleeraq Paamiut avannaatungaani kivisoq

Pujortuleeraq Paamiut avannaatungaaniitilluni immakkiartulersimavoq, ualikkullu nalunaaqutaq marluk missaani kivilluni.

- Pinartoqanngilaq, pujortuleeqqamilu inuttaasut imminnut annassinnaasimapput angalaartuniillu allanit illoqarfimmut tikiunneqarsinnaasimallutik, Kalaallit Nunaanni Politiini pigaartut pisortaat, Brian Thomsen ilisimatitsivoq.

Pujortuleeraq umiatsiaaqqamik kalitaqarsimavoq, inuttallu tassunga ikisinnaasimallutik. Pujortuleeraq kiviartulermat inuttat umiatsiamut ikisimapput. Kiviffiusup ungasinngisaanni angalaartut kingorna takkupput, inuttallu illoqarfimmut tikiussinnaasimallugit.

- Politiinit aaneqanngillat, inuttaasut umiatsiamut nassatarisimasaminnut ikillutik imminnut annassinnaasimagamik, Brian Thomsen ilisimatitsivoq.