Puisit amiinik tunitsiviit amerlanerusariaqartut

Nunaqarfiit ilaanni puisit amiinik tunisineq iluatsilluartumik ingerlavoq, aammali allani illunik tunitsivissatut atorneqarsinnaasunik amigaateqarneq pissutaalluni puisit amii eqqaannarneqartartut suli amerlapput. Amernillu tunitsivinnik nutaanik ammaanissamut periariffissat pitsaanerusariaqartut, nunaqarfiit peqatigiiffiat Kanunupe isumaqarpoq.

Sumiiffinni amerlasuuni puisit amiinik tunitsivissaaleqineq peqqutaalluni puisit amerpassui atorluarneqaratik igiinnarneqartarput. Kalaallit Nunaani puisit amiinik tunitsiviit 34-iupput.

Tasiilap eqqaani Sermiligaami aalisakkanut tunitsiveqanngilaq, kisiannili illu sullivimmi puisit amiinik tunitsivik piniartunit atorluarneqarlunilu piniartukkormiut aningaasaqarnerannut pingaaruteqarluinnartutut inissisimavoq.

Aviisi Sermitsiaq taama allappoq.

Sumiiffiilli ilaanni, soorlu Upernaviup eqqaani Innaarsunni Aappilattumilu, puisit amiinik tunitsiveqanngimmat puisit amerpassui ukiumut igiinnarneqartarput.

Nunaqarfinnilu illunik puisit amiinik tunitsivissatut atorneqarsinnaasunik amigaateqarneq iliuuseqarfiginiarlugu suliniutit piaartumik aallartittariaqartut, nunaqarfiit peqatigiiffiat Kanunupe isumaqarpoq.

Tunitsivik pinngitsoorneqarsinnaanngitsoq

Tunumi Kuummiut kisiartaalluni aalisakkanut tunitsiveqarpoq. Sermiligaallu eqqaani qaleraleqarluaraluartoq, nunaqarfimmi aalisakkanut tunitsiveqanngimmat piniartut ukiuunerani nammineq atugassaminnik aalisartoqartarput. Imaroraangalli piffissami maajimiit decemberi ilanngullugu Sermiligaami piniartut umiatsiamik ningittagarsorlutik qaleralinniarneq ingerlattarpaat pisatillu Kuummiunut tunisarlugit.

Aviisimi Sermitsiami atuarnerusinnaavutit. Aviisi uani pissarsiariuk:

Powered by Labrador CMS