Puisit amiinik tigooraasut suli ajornartorsiortut
Great Greenland siorna nutaamik pisortartaarmat tigoraasut atugassarititaasa pitsaanerulernissaannut neriulluarsimagaluartut pakatseqqasut, amernik tigooraasoq oqarpoq. Ajornartorsiutilli aaqqiivigineqarniartut Great Greenlandip pisortartaava eqqissisaalluni oqarpoq.
Puisit amerparujussui nunaqarfinni illoqarfinnilu tunitsivinni inissakilliorneq pissutigalugu ukiumut eqqaannarneqartut amerlasoorujussuusut, aviisi Sermitsiaq allappoq.
Taamaattumillu Great Greenland tunitsivinnik amerlanerusunik pilersitsiniarluni suliaqarnermini tunitsiviit marluk, Ittoqqortoormiini Itillimilu ukioq manna ammarpai.
Puisillu amiisa akii ukioq manna qaffannerat piniartunit iluarisimaarneqaraluartoq, amernik tigooraasunut atugassarititaasut suli naammaginanngilluinnartut, Kangersuatsiami amernik tigooraasoq Dorthe Løvstrøm, Great Greenlandip pisortartaavanut, Preben Møllerimut pakatsisimaqisoq, isumaqarpoq.
Atugassarititaasulli aaqqiivigineqarnissaat pimoorullugu sulissutigineqartoq, minnerunngitsumillu ukiuni qaninnerusuni puisit amiinut qerititsiveqarnikkut ajornartorsiutit aaqqiivigineqarnissaat anguniarneqartoq, Preben Møller oqarpoq.