Puisit amii pillugit WTO-p aalajangiinerani Nunarput annaasaqarnersaavoq

EU-p puisit amiinik tunisassianik Inunnut immikkut atugassaqartitsineranik taasamik nunarsuarmi niueqatigiinnermi kattuffiup WTO-p atorunnaarsitsinerata kingunerisaanik puisit amiinik kavassianik, aaqqatilianik kamippalianillu nunatsinneersunik Danmarki mattusseqaratarsinnaavoq.
EU-p puisit amiinik tunisassianik, Inunnut immikkut atugassaqartitsilluni, eqqusseqqusinnginnera pillugu WTO-mut 2011-mi suliassanngortitsisut Canada Norgelu WTO-p aalajangiinerani ajugaasuupput. Taamaakkaluartoq Canadap naalakkersuisuisa aalajangiineq ingerlateqqinniarpaat, pissutigalugu puisit amiinik eqqusseqqusinnginnissamik EU-p 2009-mit inerteqqutaa peerneqarsimanngimmat, taamatut allappoq Nunatsiaq Online.
WTO-p aalajangiinerani tikkuarneqarpoq eqqussinissamut inerteqqut ´unneqqarissumik niuernermut´ akerliusoq, tamannali naapertuillartunngortinneqarpoq innuttaasut ileqqorissaarnissaat - ´public moral concerns´- eqqarsaatigalugu.
Atuaruk: WTO: Inunnut immikkut atugassaqartitsineq unioqqutitsineruvoq
Canadami inuit kattuffianni the Inuit Tapirit Kanatami, ITK-mi, siulittaasup Terry Audla-p kamaammiutigaa puisinniarneq suaarutigineqarmat ileqqorluttuliornertut aperalunilu - qanormi nersussuit, puulukit kukkuuaqqallu?
Terry Audla-lli periarfissaqarsoraa Inunnut immikkut atugassaqartitsineq nutarsarneqarsinnaasoq, tamatumuuna isumaqatigiinniutigineqarlunilu ilusilersorneqassammat Canadami Inuit suleqatigalugit, EU-p nammineerluni immikkut atugassaqartitsilersimanera piunnaarlugu.
WTO: Kalaallit Nunaat eqqunngitsumik immikkut pineqarpoq
Kalaallit Nunaat Canadamit ilaannakortumillu Norge-mit, marluullutik aningaasarsiutigalugu puisinniartunit, salliutinneqarpoq. Tassami nunatsinni puisinniarneq aningaasarsiorpalaaneruvoq, pissutigalugu Great Greenland niuertarfittut ingerlanneqarmat. Taamaasilluni nunat assigiinngitsut assigiinngitsumik pineqarput, nunarsuarmi niueqatigiinnermi kattuffik, nunarsuarmi tamarmik nunanit 159-init ilaasortaaffigineqartoq, erseqqissaavoq.
– Kalaallit Nunaanni Namminersorlutik Oqartussat isumaqarput WTO-mit tunngavilersuutit sanngiitsut atorneqarsimasut, tassa qitiusumik ajornartorsiut ilanngunneqarsimanngimmat. Tassalu tunisassianik eqqussinissaq, tamanna tunuliaqutaqarmat nungusaataanngitsumik periuseq, assersuutigalugu aningaasarsiutigalugu aalisakkanik tunisassianik avammut tuniniaanermit, allaanerusumik pineqartariaqanngimmat, Aalisarnermut, Piniarnermut Nunalerinermullu Naalakkersuisoqarfik aalajangiineq 184-inik quppernilik pillugu tusagassiorfinnut nalunaarutikkut allappoq.
EU Issittumi Siunnersuisoqatigiinnit ingalassimaartinneqarpoq
EU Issittumi Siunnersuisoqatigiinni nunamik siulittaasuusumik Canadamik alapernaarsuisutut tamakkiisumik ilaasortanngornissaminik isumaqatigiinniuteqarpoq. Tamatumanilu pineqarnerupput puisit, tassani canadamiut oqarlutik ´No Seal, No Deal´.
EU torsuusamut inissinneqarpoq, nunat allat arfinillit, ilaatigut Kina aamma Sydkorea, ukioq manna maajip 15-ianni alapernaarsuisutut tamakkiisumik ilaasortanngortinneqartut.
Sermitsiaq.AG-p aalisarnermut, piniarnermut nunalerinermullu Naalakkersuisoq WTO-p aalajangiinera pillugu oqaaseqaateqarnissaanik qinnuigaa.