puisip amia aamma EU
Puisip amia: Kalaallit suleqatigiinnissaat Doris Jakobsenimit ujartorneqarpoq
'EU-p assigiinngisitsitsilluni immikkoortitsillunilu puisit amiinik nioqqutigisatsinnik inerteqqusinerata' ataatsimut akiorneqarnissaa Siumup folketingimi ilaasortaatitaanit ujartorneqarpoq
Kalaallit suleqatigiinnissaat.
Tamanna Siumup folketingimi ilaasortaatitaata Doris Jakobsenip anguniarpaa, 'EU-p assigiinngisitsitsilluni immikkoortitsillunilu puisit amiinik nioqqutigisatsinnik inerteqqusinerata' ataatsimut akiorneqarnissaa ujartorpaa.
Taamaattumik Naakkersuisunut, KNAPK-mut, Inuit Sila-mut aamma Inuit Ataqatigiit sinnerlugit folketingimi ilaasortamut Johan Lund Olsenimut ammasumik allagaqarpoq.
'Tamattalu soqutigisaraarput EU Parlamentimi ilaasortat tamarmik paasisimasaqarlutik – pingaartumillu qallunaat – apeqqut pillugu naalakkersuinikkut aporaattaqattaarnermi piareersimanissaat. Maannakkullu EU Kommissionip Inuit inerteqquteqarnermi peqataatinneqanginnerat pillugu aalajangersakkanik allannguinialernerani piniartortatsinnillu akornusiisinnaasup pinngitsoortinniarnerani piareersimalluarnissaq pingaaruteqarluinnarpoq', Doris Jakobsen ilaatigut allappoq.
- Taamaammat suliniuteqarnitta nukittorsarnissaa ataqatigiissaarneqarnissaalu siunnersuutigaara, taamaasillutalu EU Parlamentimi sunniuteqarnerulersinnaalerluta, Doris Jakobsen allappoq.
Periarfissat
- Aalaangersimavissumik isumaliutigaara KNAPK-p Pinngortitaleriffiullu suleqatigiillutik paasissutissanik piareersaateqassasut Europa Parlamentimi ilaasortanut paasisitsiniutitut atorneqartussanik. Paasissutissanilu nassuiaatigineqartariaqarpoq piniariaatsit Europami atorneqartut assingi periuseralugit piniartartugut. Tamatumalu saniatigut erseqqissaatigalugu piniarnermik ingerlataqarnerput piujuartitsinissamik siunertaqarluni ingerlanneqarmat, taamalu puisit ikiliartorsinnaanerannik kinguneqarsinnaanani.
Inuit Sila immaqa Bruxelles-imi paasitsiniaanernik ingerlataqarsinnaavoq, paasissutissiinernut naapertuuttunik, Doris Jakobsen oqarpoq.
- Uagullu Naalakkersuisuni Folketingimilu suliaqartugut attaveqarfigut aqqutigalugit Parlamentini ilaasortat oqaaeqartartullu amerlaanerpaat attaveqarfiginiarsinnaavagut. Tamatta assigiinngitsunik nukittuffeqarpugut,- ilisimalluinnarparalu ataqatigiissaarinikkut suleqatigiinnitsigullu anguneqarsinnaasut pissarsinarfiunerpaajusut angusinnaagavut, Siumut tunuliaqutaralugu folketingimi ilaasortaq oqarpoq.
Europa-Kommissionip puisit pillugit aalajangersagassaata Kalaallit Nunaat, aningaasaqarnikkut, inuiaqatigiitsigut, kulturikkut aamma kinaassutsikkut ajoquseqatarsinnaavai, taama nunanut allanut ministeri Martin Lidegaard isumaqarpoq. Enheslistikkormiut aamma ernummatigaat piniartut suli ajornartorsiortinneqarnerulernissaat.