Puisinniarneq pillugu filmeeraliaq nersornaaserneqartoq
Kalaallip filmeeraliaa 'Puisi' ImagineNATIVE Film Festivalimi nersornaaserneqarpoq. - Qanoq puisinniartarnerput nunarsuarmi takutikkusuppara, ilitsersuisoq oqarpoq.
Puisinniarneq pillugu filmeeraliaq Canadami filmfestivalimi Imaginativemi nersornaaserneqarpoq.
Pilutaq Lundblad, filmiliortartoq Aningaaq Rosing Carlsen peqatigalugu filmeeraq ’Puisi’, minutsinik marlunnik sivisussuseqartoq, puisinniarnermut tunngavoq, tassanilu Jens-Jakob Berglund puisimik pisaqarpoq.
Pilutaq Lundbladip "Innovation In Storytelling Award"-ip ImagineNATIVE Film + Media Arts Festivalimi pissarsiarinera qiimmatsaatigalugulu tulluusimaarutigaa. Nersornaat pingaaruteqartorujussuusoq, taassuma Sermitsiaq.AG-mut oqaatigaa.
- Puisinniarneq pillugu Kalaallit Nunaata avataaneersunit aperineqakkajuttarpunga. Kulturitsinnummi ilaasorujussuuvoq, qanorlu puisinniartarnerput nunarsuup sinneranut takutikkusussimavara.
Assiliiviit arfineq-marluk immiussarpassuillu
- Filmi 1 minut 52 sekundiinnarnik sivisussuseqarpoq, kisianni assiliiviit assigiinngitsut arfineq-marluk atorpagut immiussarpassuaqarlutalu, Pilutaq Lundblad oqarpoq, taassumalu suleqatigisani qujassuteqarfgai:
- Qujamasoqaanga nuannaaqaanga. Aningaaq Rosing Carlsen qujanarujussuaq upperalugu suleqatigerusukkamma. Jens-Jakob Berglund qujanaq suleqataagavit. Ilaqutakka tamassi qujanaq tapersersortuaannarassinga. Aappannut Camilla Mølgaardimut qujanarujussuaq eqqanniittuaannaravit tapersersorlunga- Qujanarlu NunaFonden tapiisimammat.
Pilutaq Lundblad aamma Toornani rappertartuuvoq, ulluinnarnilu Nunatta Isiginnaartitsisarfiani isiginnaagassianik aqutsisutut sulisarpoq.