Puisip amii
Puisinnianut aningaasanik bonusisitsineq
Puisinniat aamma ukiormanna Great Greenlandimut puisip amiinik tunisisimagunik bonusinnassapput.
Ukiut siulii assigalugit 2017-ip ingerlanerani Great Greenlandimut piniartunut puisit amiinik tunisaqartunut bonusimik akiliuteqartoqassasoq Inuussutissarsiornermut, Suliffeqarnermut, Niuernermut Nukissiuuteqarnermullu Naalakkersuisoq Hans Enoksen aalajangiivoq.
- Piniartut puisit amiinik tunisinerat bonusip akiliutigineratigut qujaniutigeqqissinnaanera assut nuannaarutigaara. Piniarnermik inuussutissarsiut tassaavoq kulturikkut kingornutatsinni pingaarutilittut ilaasoq, aamma piniarnermik kulturitta puisinillu piujuartitsisumik piniarnerput takussutissartaqartinnissaata qulakkeernissaa pingaartippara, Hans Enoksen tusagassiuutinut nalunaarummi oqarpoq.
2017-imut bonusit tamarmiusut 1,5 millionit koruuniussapput, aammalu puisit amiinik tunisinermut tapiissutaasunut aningaasaliissutit tamarmiusut iluannit aningaasaliiffigineqarput, tamanna ilisimatitsissutigineqarpoq.
Akiliuteqarneq piniartut ataasiakkaat tunisartagaat naapertorlugit annertussusilerlugit Great Greenland aqqutigalugu pissaaq.
Akiliuteqarnissat sapaatip akunnerata takkuttussap ingerlanerani naammassinissaa naatsorsuutigineqarpoq.