ammit
Puisi qaqutigoortoq piumaneqarluartoq
Puisi qasigiaq eqqissisimatitaavoq. Great Greenlandip taamaattumik puisit taakku amii tuniniarsinnaanngilaat, pisortaq nutaaq nassuiaavoq
Great Greenlandip pisortartaavata, Ditte Sorknæsip, qasigissat Kalaallit Nunaanni qaqutigoornerulersimammat ajuusaarutigaa.
- Inunnik qasigissanik piserusuttunik saaffigineqakulavugut, naak ammit taakku ukiorpassuarni piginikuunngikkaluarigut. Inuit kamapput, kisianni uagut ikiorsinnaanngilagut, pisortaq tusagassiuutinut nalunaarummi allappoq.
- Puisi eqqissisimatitaalluinnarpoq, peqqussullu taamaattoq Great Greenlandip soorunami malippaa.
Qasigissat aamma Islandimi ikinnerusut
Amerlasuut kalaallisuuminnut qasigissat amiinik perusungaaramik, Islandimi amernik pisisarput.
Tassanilu aamma kisianni amerlassusaat ikiliartorput, taamaattumillu amernik tassanngaanniik pissarsiuminaalliartussaaq.
Atuaruk: Arferit puisillu neqaat puagissaartitsipput
Ilisimatuup nassuiaatigaa, puisit taama ittut nungulluinnarnissaminnut ulorianartorsiorsinnaasut.
- Puisit qasigissat Kalaallit Nunaanni qaqutigoortorujussuanngornikuuvoq. Taanna 2010-mi eqqissisimatinneqalerpoq, tamannalu piffissaq kingulleq atorlugu pigunarpoq, Aqqalu Rosing Asvid, Pinngortitaleriffimmi ilisimatusartoq oqarpoq.
Taarsiullugu ima iliorit
- Kalaallit Nunaanni piniaannaraanni nunguinnissaanut suli ulorianartorsiorpoq. Puisit milallit aalajangersimasunik sumiiffeqartarput. Sumiiffiillu ilisimaneqartut nakkutiginiarsarisarpagut, uumasullu 100-nit amerlanerunngillat. Sumiiffinnik ilisimanngisatsinnik peqarnissaa neriuutiginarpoq, kisianni puisit ikitsuinnaassasut ilimanarpoq.
Great Greenlandimit kajumissaarutigineqarpoq natsiat amiinik ersarissunik milattaqartunik pisisoqartassasoq.
- Taakku qasigissanut assingulaarput, ammerivimmi pisortaq oqarpoq.
Atuaruk: Great Greenlandip puisit pillugit isumaqatigiissummik nutaamik ajoqut peerpaa