Royal Greenland
Puha - raajat 335 tonsit bakterianik nassaarfigineqanngillat
- Naammagisimaaqaarput raajat qalatat qalipaajakkallu tonsit kingulliit tallimanngormat Ilulissaniit akuerisinnaagatsigit, suliffeqarfissuaq taama ilisimatitsivoq
Raajanik mamarisalinnut nutaarsiassatsialak.
Raajat Ilulissaneersut 335 tonsit qaammatip ataatsip ingerlanerani suliffeqarfissuarmi avataanilu misissukkat bakteriaqarnerannik nassaarfigineqanngillat.
Ilulissani imermik qalatitsinissamik inassuteqarneq aallaavigalugu Royal Greenlandip tappiorannartunik misissuisarfiisa qullersaqarfianni Nuummiittumi aammalu misissuisarfimmi avataaneersumi Alcontrolimi Sverigimilu inissisimasumi peqqissaarulluinnarlugu misissuinernik kinguneqarsimavoq. Qaammatip ataatsip ingerlanerani katillugit ullormut misissugassat tallimat ingerlanneqarsimapput.
- Misissukkavut pitsaanerpaamik angusarqarfiginiarlugit ullormi tunisassiorfiusumi misissugassat tallimaasut ataatsimut akulerullugit misissortarsimavagut. Nammineq uagut avataaneersullu misissugaat nassaarfigineqarsimanngillat, tassa misissukkat Clostridium Perfringensimik, Listeriamik imaluunniit e-Coli bakterianik nassaarfigineqarsimanngillat, suliffeqarfissuarmi pitsaassusilerinermi ingerlatsisoq Annette Mortensen unnersiorpoq.
Raajat maajimili tunuartinneqartut
Royal Greenlandi tunisassiat maajip 26-aniit erngullu ajoquteqarunnaarnissaata tungaanut tunisassiat immikkoortilllugit illuartinneqarnissaannik aalajangerpoq, taamaasillunilu raajat qalatatut qalipaajakkatullu tunisassiaareersut katillugit 335 tonsit illuartinneqarsimapput.
- Naammagisimaaqaarput raajat qalatat qalipaajakkallu tonsit kingulliit ullumi Ilulissaniit akuerisinnaagatsigit, uangalu misissuisimanermi inernerit ammalu Ilulissani pitsaassusilerinermik ingerlatsineq tunisassianik utertitsillunilu tamakkiisumik unitsitsiffiusariaqarsimasut naammagisimaarutigeqaakka, suliffeqarfissuarmi pitsaassusilerinermi ingerlatsisoq Annette Mortensen oqarpoq.