Psykolog: Matugallaqqanerup nalaani imminut eqqaamagit

Innuttaasut ataatsimoorsinnaajunnaaqqaneranni tarnikkut peqqissuuneq ukkatarineqarnissaa pingaaruteqarpoq. Psykologi namminersortoq Inuk Lone Bourup Bang ernumanermi annilaanganermilu qanoq imminut eqqissisarsinnaanermik ilitsersuutiliorluni videoliorsimavoq.

Anersaartorit.

Eqqissilluinnarit.

Coronap ajornartorsiortitsinerata nalaani annilaanganeq ernumanerlu nalinginnaalluinnarput.

Anersaartornissalli eqqaamajuk.

Taama oqaluttuarpoq psykologi namminersortoq Inuk Lone Bourup Bang, taanna Facebookimini videoliorsimavoq. Immiussani nassuiarpai misigissutsit annilaanganeq ernumanerlu, taakkulu peqqissutsikkut ulorianartorsiortoqarnerani, soorlu massakkut, misigissallugit nalinginnaalluinnartuusut. Aammali ilitsersuusiorpoq qanoq iliorluni eqqissarsoqarsinnaanersoq.

- Mattusimanitsinni allanik isumaginissaqanngilagut, aamma allaniik paarinissaqanngilagut, taamaammat imminut paarisinnaanissaq pisariaqarpoq. Nammineq iliuuseqanngikkutta susoqarnaviannginnami, Sermitsiaq.AG-mut oqarpoq.

Taanna isumaqarpoq innuttaasut angerlarsimaffimminni sammisassaqarnissamut pikkorilluinnartuusut.

- Unaliuna uanga pigiga tarnikkut imminut nukittorsarsinnaaneq, tarnikkullu imminut isumassorsinnaaneq.

- Tamattami maanna “mattusimaneruvugut” inoqatitsinnullu akulerunnata, taamaammat aamma kiserliornermik misigisimasinnaalluta. Nalussanngilarpulli kisimiinnata, tamatta taama inissisimavugut, nukissaqarluassaguttalu nammineq iliuuseqarnikkut tarnikkut nukittorsarsinnaavugut , oqarpoq erseqqissarlugulu inuit tamarmik assigiinngitsut atorlugit nukimmik aallerniartartut. Soorlu erinarsorluni, meditererluni, yogarluni, assassorluni nipaattumiilluniluunniit, imaluunniit allarluinnarmik suliaqarluni.

Nalimmassarneq

Immiussamini nassuiaavoq qaratsami ulorianartoqarneranik nalunaartartoq qanoq pisarnersoq, taamaattoqarneralu sooq ajunngitsuunersoq. Aammali ilitsersuivoq imminut eqqissisarsinnaaneq pillugu, soorlu anersaartorneq atorlugu.

Immiussani siulleq uani takusinnaavat:

- Ullumikkut pissutsit allanngorput, taamaammat inuusaaserput aamma allanngorpoq. Inuit qangarsuarliilli avatagiisiminnut tulluarsarlutillu nalimmassartarsimapput. Isumatusaartariaqarpugut inuiaat ingerlaannassagutta, maannamut ileqquliussimasagut allanngulaartariaqarsimagutsigit taamaaliussaagut . Tarnikkut anersaakkullu aamma nukittuujusariaqarpugut, imminut piumaffigisinnaavutit ulloq nutaaq aallarnerfiginerani ilinnut tarnikkut anersaakkullu nukittorsaataasinnaasoq arlaat ullup naatinnagu atorusullugu, Inuk Lone Bourup Bang oqarpoq.

Immiussat kalaallisut oqaasertaqartut minutsit 12-it 25-illu akornanni takissuseqarput.

Powered by Labrador CMS