Psykologi politikerinut iliuuseqaqqusisoq: Imminut toquttarneq akiorneqarli
Maanna iliuuserineqartoq iluatsinngilaq, taamaattumillu imminut toquttarnermik pitsaaliuinermut sullissivimmik pilersitsisoqartariaqarpoq, psykologi Heidi Lindholm isumaqarpoq.
Politikerit eqeerlutik imminut toquttarnerup akiorneqarniarneranik oqariartuutiminnik iliuuseqartariaqarput. Psykologi Heidi Lindholm taama isumaqarpoq, taanna Inatsisartunut ilaasortanut allagaqarpoq.
- Ullut qulikkaarlugit Nunatsinni inummik imminut toquttoqartarpoq. Ullut qulikkaarlugit ilaqutariit, ikinngutigiit, atuarfik, inuiaqatigiit qanigisaminnik annaasaqarnermik eqqugaasarput. Oqaluuserisarparput. Sumi tamaani; allaat kaffisortitsinerni, taanna allappoq.
Kikkut tamarmik atorfissaqartinneqartut innuttaasunut eqqaasitsissutigisariaqarparsi
Ajornartorsiutip oqaluuserineqaannarnera taamaatittariaqarpoq, iliuuseqartoqartariaqarpoq.
- Ajornartorsiut pimoorullugu ilissi politikerit takutissavaatsigut, ataqatigiissumik aaqqissuussillusi aamma ersarissumik ikiuinissamik neqerooruteqarlusi, taanna allappoq.
Iliuuserisat iluatsinngitsut
Maanna iliuuserineqartoq iluatsissimanngitsoq politikerit paasisariaqaraat, taanna isumaqarpoq.
- Kalaallit Nunaanni Imminut Toquttarnerup Pitsaaliornissaanut Nuna Tamakkerlugu Periusissaq 2013-2019 pilersissimagaluarissi, sunniutaanik takusaqanngilagut. Periusissiap ukiuni tallimani atuunnermini imminut toquttartut amerlassusaat ikilisissimanngilai.
Periusissiami politiit, kommunit aamma peqqinnissaqarfik qanimut suleqatigiinnerunissaat siunertaavoq. Pappiaqqatigut eqqarsaatitsialak, kisianni Heidi Lindholmip misilittagaasa takutippaat piviusoq allaanerusoq.
- Ajornartorsiut suliassaqarfinnit arlalinnit suliniutiminnik ataqatigiissaarinissaminnit annertuumik ajornartorsiuteqareersunit aaqqiivigineqarnissaa kissaatigineqarnera sanngiissutaavoq, psykologi oqarpoq, ilanngullugulu oqaatigaa periusissiaq suliaqartut pisariaqartitaannik imminut toqunnissamik eqqarsaateqartunit ukkataqarnerusariaqartut.
Nuna tamakkerlugu pitsaaliuinermut sullissivik
Taamaammat suliniut tamaat sullissivimmut ataatsimut kattunneqartariaqartoq, Heidi Lindholm isumaqarpoq, taanna ataatsimik siunertaqassaq: imminut toquttarneq pinngitsoortillugu.
- Ilissi politikerit ikiuinermik suli neqeroorutigisimanngisassinnik neqerooruteqassaasi. Inuunermut pingaarutilerujussuarmik pilersitsisariaqarpusi: Nuna tamakkerlugu imminut toquttarnermik pitsaaliuinermut sullissivik. Taanna sullissivik ikiorneqarnissamik pisariaqartitsisunut tamanut anngutissaaq.
Sullissivik taamaattoq Heidi Lindholmip oqarnera naapertorlugu aniguisunut, imminut toqunnissamik eqqarsartunut qimagaasunullu katsorsaanermik neqerooruteqassaaq. Inunnut ammasumik aamma kinaassutsimik oqaatiginninnani saaffiginnittunut siunnersuinermik neqerooruteqartassaaq, ulloq unnuarlu oqarasuaammik saaffiginniffissamik ingerlatsissaaq, Ilisimatusarfik peqatigalugu tamanna pillugu ilisimasanik pisariaqartunik katersiffiussaaq.
Pisarnitsitummi iliuinnarniarutta imminut toquttarnerpassuit akisuallaaqaat, Heidi Lindholm isumaqarpoq.
- Kikkut tamarmik atorfissaqartinneqartut innuttaasunut eqqaasitsissutigisariaqarparsi. Neriuutissaarunneq qaangiuttartoq. Kikkut tamarmik nalituujusut. Minnerinngutsumillu imminut toquttoqarnerata kingorna qimagaasunut kingunissat inuunermik allannguisut. Qimagaasut qajannarsisartut aamma ajortiasunngorlutik uteqqinneqarsinnaanngitsumik annaasaqarnertik inuunermi sinneranni nassatarisariaqartarpaat. Ikilerneqartutut illutik, taassuma Inatsisartuni politikerinut oqariartuutaani tamanna allaqqavoq.