Professori: Sermersooq navianarluinnartumik iliuuseqarsimavoq

Naalakkersuisut Kommuneqarfik Sermersooq 1,25 milliarder koruuninik taarsigassarsissanersoq isummerfigissavaat. Allanilli periarfissaqartoqarpallaanngilaq, sanaartukkammi aallartilluareerlutilluunniit naammassineqareersimapput. Kommuni Namminersorlutillu Oqartussat assingusumik inissisimasut, aningaasqarnermik aqutsinermi professori oqarpoq.

- Kommuni Namminersorlutillu Oqartussat assingusumik inissisimapput, Nikolaj Bukh Kommuneqarfik Sermersuup 1,25 milliarder koruuninik taarsigassarsinissamut qinnuteqaataa pillugu oqarpoq.

Kommuneqarfik Sermersuumit ukiualuit matuma siornatigut atuarfinnik, ulluunerani paaqqinnittarfinnik sullorsuarnillu koruuninik miliuunilikkaanik nalilinnik sanaartornissamut aningaasaliissuteqarnissaq pilersaarutaasimavoq. Pilersaarut kommunip illoqarfimmik ineriartortitseqatigiiffianit Siorarsiorfik - Nuuk City Developmentimit (NCD) qitiutinneqarsimalluni.

Pilersaarulli iluatsinngitsoorneqarsimavoq, NCD aningaasaliissutissatut kissaatigineqartunik pissarsisinnaasimanngimmat, taamaammallu kommuni iliuuseqartariaqalersimalluni, maannalu pilersaarutip aappaa Naalakkersuisunut akueritikkusullugu.

Pilersaarutaavoq NCD-på suliaanik kommunip tigusinissamut akiliuteqarnissamullu 1,25 milliarder koruuninik taarsigassarsiniarnissaa.

Aningaasaqarnermik aqutsinermi professorip Per Nikolaj Bukhip oqaatigaa, kommuni annertuallaanik anguniagaqarsimasoq maannalu aaqqissuussisariaqalersimalluni:

Iliuuserisinnaasat ikittuinnaasut

- Kommuni navianarluinnartumik iliuuseqarsimavoq. Anguniagaq iluatsinneqarsimasuuppat iluanaaruteqartoqarsimassagaluarpoq, maannali Namminersorlutik Oqartussat ikiuuttariaqalerput, Per Nikolaj Bukh oqarpoq.

Taassuma oqaatigaa, kommunip aningaasarpassuarnik taarsigassarsinissamik siunnersuutaanut Naalakkersuisut akuersissuteqarnissaminnut atatillugu iliuuserisinnaasaat ikittuinnaasut.

Tamatumunnga pissutaanerarpaa, Kommuneqarfik Sermersuup taarsigassarsinissamik qinnuteqataa Naalakkersuisunit akuerineqanngippat NCD-p akiliisinnaajunnaarnissaa aamma Nuup qeqqani atuarfiliarsuup affaannaata naammassineqarnissaa, professorilu naapertorlug tamanna 'attanneqarsinnaanngilaq'.

Taamaammat kommunip taarsigassarsinissamut pilersaarutitut saqqummiussaa pitsaanerpaatut aaqqiissutaasinnaanerarpaa:

Assingusumik inissisimasut

- Innuttaasut matumani eqqorneqarsinnaapput. Taamaammat suliniutip pitsaasuunnginnera pillugu aallaqqaataaniilli oqallinneq unitsinneqartariaqarpoq.

- Kommuni Namminersorlutillu Oqartussat assingusumik inissisimapput, Per Nikolaj Bukh oqarpoq, tassungalu atatillugu aamma oqaatigalugu Kommuneqarfik Sermersooq Kalaallit Nunaanni kommuninit allanit anginerungaatsiartoq aningaasaqarnikkullu siuttuusoq. Tamatumalu malitsigisaanik Naalakkersuisut kommunip ajornartorsiutaanut tusaanngitsuusaarsinnaanngitsut.

Per Nikolaj Bukhip ilanngullugu nassuiaatigaa, kommunip taarsigassarsinissamik qinnuteqaataata ukiup naannginnerani akuerineqarnissaa pisariaqarluinnartoq, taarsigassarsiniarnermi kommunip 2023-mut missingersuutaanut aamma NCD-p inissiaatileqatigiiffimmut Iserimmut kattunneqarnissaanik pilersaarutaanut kiisalu NCD-p sanaartortitaanik ilaatigut naammassineqarsimasunik sulilu suliarineqartunik tigusinissaanut tamanna pingaaruteqarluinnarmat.

Aappaatigulli Naalakkersuisut Kommuneqarfik Sermersuup taarsigassarsiniarneranik akuersissutigineqarneratigut sanaartornermik akuerinnittussaapput. Taarsigassarsinissamilli akuersissuteqarnikkut Naalakkersuisut piumasaqaateqarsinnaasut, professori naliliivoq.

Professori: Imminut sullinnertut isikkoqartoq

Per Nikolaj Bukhip oqaatigaa, Kommuneqarfik Sermersooq 'imminut sullissimasutut' isikkoqartoq, tamannalu kommuninut allanut nuannerpallaanngitsumik takutitsinerusoq. Naalakkersuisullu taamaammat kommunimut piumasaqaatitalimmik aaqqiissutissamik allamik aalajangiisinnaasut:

- Naalakkersuisut aaqqiissutissaq sunaluunniit toqqaraluarpassuk, taarsigassarsinissamik qinnuteqaammik akuersissummut kommunip aaqqiiffigisariaqagaatut naalakkersuisoqarfimmit aaqqiiffigineqartariaqartutut isigineqarlutik allattorneqarsimasut piumasaqaatit ilanngunneqarsinnaapput. Assersuutigalugu aningaasartuutissat aalajangersimasumik amerlassusillit akuerineqaqqaartussanngortinneqarsimasut naalakkersuisoqarfimmut annguteqqaarneqartarnissaat piumasaqaataasinnaavoq.

- Ulluinnarni tamanna taaneqartarpoq, kommuni nakkutigineqalersoq, professori oqarpoq.

Naalakkersuisut kingullermik nalunaarutaat malillugu, suliaq decembarip 15-iani ataatsimiinnermi aatsaat Naalakkersuisunut ssaqqummiunneqassaaq.

Powered by Labrador CMS