Professorip Sermersuumi missingersuut assortuussutaasoq nersualaarpaa

Kommuneqarfik Sermersuup qanittukkut 2023-mut missingersuutini akueraa. Missingersuut pillugu oqallittoqarnikuuvoq, kommunip illoqarfimmik ineriartortitsinermut ingerlatseqatigiiffianit ingerlanerluttumit sanaartornermik suliat tigunissaannut kommuni 1,25 milliardinik taarsigassarsisinnaaneranik piumasaqaatitaqarnera pissutigalugu.

Taarsigassarsiarpassuit kommunip pingaarnertut atugarissaarnermut neqeroorutaannut, soorlu meeqqat atuarfiisa, ulluunerani paaqqinnittarfii aamma utoqqaat illuinut taarsigassarsiarujussuarnut akilersuinermi sunniuteqarnavianngitsut, kommunimi pisortaq Ole Jakobsen tassunga atatillugu oqarpoq.

Aningaasanik aqutsinermi professori, Per Nikolaj Bukh, kommunimi pisortap oqaaseqaataanut maani Sermitsiaq.AG-mi naliliitipparput, pitsaanerarpaalu:

- Ataatsimut isigalugu oqaaseqarnermini ilumoortoq isumaqarpunga. Ilumoorlunilu unneqqarippoq, piviusorsiortumillu isigivaa.

Pitsaasumik tupaallattoq

- Missingersuutit taama ataqatigiitsiginerat tupaallaatigaara, Per Nikolaj Bukh oqarpoq. Kommunip ukiuni sisamani isertitassani missiliorluarsimagai maluginiarpaa, tamannalu pitsaaneranik takussutissaanerarlugu.

- Kommuni aningaasarpassuarnik atuiumagaangat, nalinginnaasumik ukiuni sisamani isumalluarpallaartoqarsinnaasarpoq. Maanna ingerlalluartoqanngitsoq oqaatigineqartarpoq, iluarsisussaanerarneqarlunilu. Uani taamaattoqarsorinngilara, Per Nikolaj Bukh.

Kommunip NDC-p iluarsarniarneranut aningaasaliiniarnera piviusorsiortutut nalilerpaa, tamatumalu saniatigut politikkikkut kissaatinut inissaqartitsisoqarnera tupaallaatigalugu:

- Suut ingerlanneqarniarnersut takuniarlugu tusagassiuutinut nalunaarut missingersuummillu isumaqatigiissut atuarakkit, pitsaasorpassuit aallartinneqarniarnerat tupaallaatigaara, taanna oqarpoq.

Ajornartorsiut

Aningaasarpassuit taakku taarsigassarsiariniarlugit kommuni Naalakkersuisunit suli akuersissuteqarfigineqanngilaq, taamatullu missingersuut Naalakkersuisut akuersissuteqarnissaannit ilaatigut piumasaqaatitaqarpoq.

Iluarsaassiniarnermut taarsigassarsinissaq pisariaqartoq, professorip oqaatigaa:

- Taarsigassarsiassat amerlasuut aporfiupput. Soorunami tamatuma ajornartorsiutigineqarnera uggornartuuvoq, kisianni taarsigassarsinissamut akuerineqaraanni iluarsaassisoqassaaq, kingumullu qiviarluni naammagittaalliutaajunnaassaaq.

- Naak qangali ajornartorsiutaasussanik pisoqarsimagaluartoq kommuni ingerlallualersinnaavoq. Una aningaasanik atorluaaneruvoq, tunngaviusumik atugarissaarneq nukittorsarneqarluni, Per Nikolaj Bukh.

- Iluarsaassisoqartariaqarpoq

Illoqarfimmik ineriartortitsinermut ingerlatseqatigiiffiup NCD-p iluarsaanneqarnerata saniatigut, inissiat 400-t kommuni namminersortunit attartukkaminik isumaginnittussaavoq. Aappaagu inissiat kommunimut 29 millionit koruuninik aningaasartuutaassapput, kommunip tapiissutinut akiligassai, attartortitsinerup amigartoorfiunera pissutigalugu.

Tamanna atugarissaarnermut akeqarsimasinnaasoq, suliaq pillugu Per Nikolaj Bukh oqarpoq, kisianni siumut isigisoqartariaqarpoq:

- Atugarissaarnermut atorneqarsinnaagaluartunik kommunimut akilimmik aaqqissuisoqarsimanera paasinarsimmat iluarsaassisoqartariaqarpoq.

- Siumut isigigaanni taamaatinneqarsinnaapput, qaangerniarneranilu akiligassartai akilerlugit.