Professori: Innuttaasut brexitimut taasitinneqaqqinneranni aallaqqaataaneertoqarsinnaavoq

Tuluit Nunaanni nutaarsiassaqartitsiviit arlallit nutaarsiassiinerat naapertorlugu, tuluit premierministeriata Theresa Mayip EU-mit tuluit aninissaat pillugu isumaqatigiissutaa, Tuluit Nunaanni naalakkersuisuni ilaasortaasut ministerit amerlanerussuteqartunit tatigineqarunnaarpoq.

Taamaammat premierministeri aaqqiissummik allaanermik suliaqartariaqaleratarsinnaavoq, naggataani innuttaasunik taasititsinermik nutaamik kinguneqartumik.

Københavnip Universitetiani EU-mi politikki pillugu professori, Marlene Wind, taama naliliivoq.

- Innuttaasunik taasititseqqinnermi qulakkeerneqassagaluarpoq ilumut innuttaasut EU-mit anerusunnersut. Anerusunngippatalu niuernerup iluani qanoq kissaateqartoqarnersoq paasiniarneqarsinnaagaluarpoq.

- Tuluit aninissaannut siunniussaqartut nipagiimisinneqarsinnaagaluarput politikerillu akunneranni aaqqiagiinnginneq iluarsineqarluni. Periarfissat allat tamakkerlugit misilinneqareermata, allamut ingerlarpasinngillat, Marlene Wind oqarpoq.

Innuttaasunik taasititseqqiineq pingasunik periarfissaqarsinnaasoq taanna eqqoriaavoq. Theresa Mayip isumaqatigiissutaanut taasineq, isumaqatigiissuteqarani EU-mit ilaasortaajunnaarneq imaluunniit EU-mi ilaasortaaginnarneq.

Tassungali killitsigani, Theresa Mayip naggataasumik periarfissarsiornissaa ilimanarpoq, isumaqatigiissutini tuluit inatsisartuini akuerineqarnissaa anguniarlugu.

- Inatsisartuni taasititsinissaq januaarimut kinguartinneqarpat imaaratarsinnaavoq inatsisartuni politikeriusut qinersisartuminnit pillarneqarumanngikkunik isumaqatigiissummut akuersiinnartariaqartut, Marlene Wind oqarpoq.

Tassunga atatillugu Tuluit Nunaata EU-mit martsip naanerani ilaasortaajunnaarnissaa tulluarluinnartoq, majimilu Europa-parlamentimut qinersisoqartussaanera tulluarluinnartut, taanna naliliivoq.

Isumaqatigiissulli inissinneqarsinnaanngippat apeqqutaalerpoq Tuluit Nunaat qineqqusaartitaqassanersoq.

Ministerit ilaasortallu arlallit oqartareerput, Norge assigalugu Tuluit Nunaat EU-mut atassuteqassasoq.

Tassa imaappoq Tuluit Nunaat EU-p iluani niueqatigiinnermut attuumassuteqassasoq, politikkikkulli sunniuteqarsinnaassanngitsoq, soorlu EU-mut qinersinermut qinigaatitaqassanani.

- May tamanna tulluarsorinngilaa, aammami tuluit aninissaannut tapersersuisut tulluarsorinngilaat, taamaaliornikkummi aalajangiisinnaassuseq ipararneqassaaq, sulili EU-mut akiliisariaqarneq attanneqassalluni, Marlene Wind nassuiaavoq.

Marlene Windip oqarnera naapertorlugu tuluit inatsisartuini amerlanerussuteqartut norgemiut iliuusaattut perusupput.

Illuatungiliuttuusut Labourimeersut aaqqiissummik taama ittumik takorusupput, siulittaasualli Jeremy Corbyn, isumaqataanani.

Labour-imit politikeri Stephen Kinnock norgemiusut iliorusuppoq. Taanna ministeriunerusimasumut Helle Thorning-Schmidt katissimasuuvoq.

/ritzau/