Professori taarsigassarsiniarneq pillugu: Oqartussat torersaasariaqarput

Kommunalbestyrelsi Qaqortumi, Nuummi Ilulissanilu timmisoqarfissat sanaartorneranni akigitinneqarniartut tamarmiusut sisamarterutaannik annertutigisumik taarsigassarsinissamik siunnersuummik ullut tamaasa suliaqartanngillat.

Taamaakkaluartoq tamanna ataasinngornermi pisussaavoq, tassani kommunalbestyrelsi 1,25 milliarder koruuninik taarsigassarsinissamut periarfissanik kommunip misissuinissaanik siunnersuut suliaqassagami.

Taarsigassarsiarineqarniartut annertoorujussuit kommunip illoqarfimmik ineriartortitseqatigiiffiutaata Siorarsiorfik Nuuk City Development A/S-ip (NCD) sanaartortillugit aallartereersimasai akilissavai. Sanaartorneqartut tassaapput atuarfik ataaseq, ulluunerani paaqqinnittarfiit arfinillit qatserisartoqarfillu.

Ingerlatseqatigiiffik sanaartukkanut akiliuteqarniarluni aningaasaliisussamik nassaarsinnaasimanngilaq, soorlu aamma periuserineqartoq Namminersorlutik Oqartussanit akuerineqarsimanngitsoq.

Taamaammat apeqqutaanngilaq illoqarfimmik ineriartortitsiniartut aningaasanik nassaarsinnaanerat imaluunniit nassaarsinnaannginnerat. Apeqqutaavoq aningaasat qanoq nassaariniarneqarnissaat, sanaartornerimmi naammassineqareerput imaluunniit sanaartorneqaleruttorlutik.

Aningaasaqarnermut ajutoortitserujussuarnerua?

Aalborg Universitetimi professorip Per Nikolaj Bukhip tamanna imatut nassuiaatigaa:

- Kommuni taarsigassarsippat aningaasaqarnermut ajutoorujussuartitsissanersoq apeqqutigineqarsinnaava? Naamik, aalajangiisoqarmat kukkorujussuartoqarsimasinnaavoq. Siusinnerusukkullu aalajangiisimanerit kinguneri maanna torersarneqaleruttorput.

- Tamanna avaqqunneqarsinnaanngilaq. Suliaqarnissamummi atortussat pisiarineqareerput, taamaammallu torersaasoqartariaqarluni, Per Nikolaj Bukh oqarpoq.

Aalajangiisoqarmat pilersaarutaasimavoq, NCD-p sanaartortitai OPP-imik suleqatigiinnertut taaneqartut naammassineqassasut, tassani namminersortutut aningaasaliissuteqartartut sanaartortussaapput, assersuutigalugu atuarfiliortussaapput, atuarfillu kommunimut attartortittussaallugu. Pilersaarutaasimavoq fem milliarder koruunit angullugit nalilinnik sanaartortoqassasoq, tassani kommuni sanaartukkat pingajorarterutaannut akiliuteqartussaalluni. Illoqarfiummi immikkoortortassaanik nutaarluinnarmik sanasoqartussaammat.

Ilisimasallit mianersoqqusisimasut

Pilersaarut aallaqqaammut atuarfiliornissamut ulluuneranilu paaqqinnittarfiliornissamut annikillisinneqarsimavoq. Sanaartornerit aallartinneqareerput, ilaallu naammassineqareersimallutik, kommunilli sanaaartukkanik attartornissaa inissinneqanngisaannarsimavoq.

Pilersaartut 2017-imi saqqummiunneqarmat ilisimasallit arlallit oqaatigisimavaat, kommuni sanaartukkanik arlalinnik taamanikkut akissaqartinngisaminik aallartitsiniartoq.

Ilisimasallit taakku ilagivaat Per Nikolaj Bukh, taassuma 2017-imi ilimagereersimavaa, Kommuneqarfik Sermersuup OPP-mik suleqatigiinnertut taasamik sanaartortitsinnissani ajornartorsiutigissagaa. Taassumami nalilersimavaa, sanaartortitsiniarneq Kalaallit Nunaanni pissutsinut aamma kommunip tamarmiusumik aningaasaqarneranut sanilliullugit annertuallaartoq.

Tassa aningaasaliissuteqarsinnaasut aningaasarpassuarnik taarsigassarseriarlutik kommuni sinnerlugu sanaartornissamut akilerneqartariaqarmata.

Namminersorlutik Oqartussanit taperserneqarnissaat naatsorsuutigigaa

NNCD-mi suliniut maanna iluatsinneqanngitsoorpoq, kommunilu annaassiniarluni suliaqalersimalluni, annaassiniarnerlu kommunalbestyrelsimit akuerineqaannarani aamma Naalakkersuisunit akuerineqartussaalluni.

Per Nikolaj Bukh naliliivoq, kommuni Namminersorlutik Oqartussanit taperserneqassasoq:

- Suliniut annikitsunnguusimappat, Namminersorlutik Oqartussani immaqa oqaatigineqassagaluarpoq, kommunip tamanna nammineq ajornartorsiutigigaa namminerlu tamanna aaqqiiffigisariaqaraa.

- Suliassarli annikitsunnguunngilaq. Oqartussallu tamanna isiginngitsuusaarsinnaanngilaat, Per Nikolaj Bukh oqarpoq.

Kommuneqarfik Sermersuumi ingerlatsivik naapertorlugu, iliuuseqartoqanngippat NCD ukiup naanerani aningaasaqarnikkut ajornartorsiorujussualersinnaavoq.