Aningaasanut inatsit
Professori: Politikerit ajornartorsiutit saaminnut ajattorpaat
Aaqqissuusseqqinnerit pisariaqartut politikerit suliarisimanngimmatigit, taamalillutillu aningaasanut inatsimmi amigartoortuarnerat, Torben M. Andersenip isornartorsiorpaa
Partiit 2016-mut aningaasanut inatsimmik akisussaasut, Siumut, Demokraatit aamma Atassut, aningaasatigut ajornartorsiutit illikartiinnartaraat, aaqqissuusseqqinnissat pisariaqartut suliarinngikkaangamikkit.
Amigartoorneq
Taakku 2016-mut aamma 2017-mut amigartoortumik aningaasanik atortussanik naatsorsuipput. Aatsaallu ukiut marluk qaangiutereerpata politikerit sinneqartoorlutik ingerlalissapput, aningaasanullu inatsisini aningaasat isertitat atortitallu assigiilissapput.
Aarhus Universitetimi aningaasaqarnermut professori aamma Aningaasaqarnermut Siunnersuisooqatigiinnilu siulittaasoq, Torben M. Andersen, KNR-mi apersorneqarluni naliliivoq.
Atuaruk: Aningaasanut inatsimmi allassimasut takukkit
Suli iluatsinnikuunngitsoq
- Amigartooruteqariarluni siunissami oqimaaqatigiisitsinissamik neriuuteqartoqarluni aningaasanut inatsimmik maannatut suliaqartoqartartoq takusareerparput. Taamaaliornerli iluamik suli iluatsinnikuunngilaq, taamaammallu ajornartorsiutit aaqqinnagit siunissamut kinguartitsinertut oqaatigineqarsinnaavoq, Torben M. Andersen KNR naapertorlugu taama oqarpoq.
Utoqqaat amerliartortut
Taassuma politikerit iliuuseqaqqullugit kaammattorpai. Taamaanngippat aningaasartuutit isertitanit amerlaneruleraluttuinnassammata. Matumanilu pingaaruteqartoq tassaanerarpaa, utoqqaat amerliartuinnartussaanerat, aammalu pensiuunisiassanut aningaasartuutit amerlinissaannik allanillu kinguneqassasoq.
Atuaruk: Mamakujuttunut akitsuut marloriaatinngussaaq