Professori mianersoqqusivoq: Qilalugarniarneq Kalaallit Nunaata tusaamanerlugaassutigilissavaa
Kalaallit Nunaata biologit assortorpai. Tunup kujataani qilalukkanik qernertanik piniarneq ingerlatiinnarneqassappat Naalakkersuisut politikkimik, naalakkersuisoqatigiinnissamik isumaqatigiissummut akerliusumik ingerlatsipput, tamannalu Kalaallit Nunaata nunani tamalaani isigineqarneranik innarliissaaq.
Tunup kujataani qilalukkat qernertat, meterinik sisamaniit tallimanut angissusillit, illua’tungaani nunatsinni politikerit piniartullu, illua’tungaanilu nunani tamalaani biologit, akornanni sivisuumik aaqqiagiinngissutaasimapput.
Aviisi Sermitsiaq taama allappoq.
Mads Peter Heide-Jørgensen, Pinngortitaleriffimmi uumasunut miluumasunut timmissanullu immikkoortortaqarfimmi professori aamma dr.scient., Nammcop ilisimatuussutsikkut komitéani ilaasortaasoq, qularuteqanngilaq:
- Kalaallit Nunaanni naalakkersuisut oktobarip qiteqqunnerani Ittoqqortoormiit Tasiilallu eqqaanni qilalukkanik qernertanik 2021-mut pisassiissutinik qaffaanerisa kingorna Kalaallit Nunaat nunarsuarmi tatigineqarunnaassaaq. Naalakkersuisut Tunup kujataani qilalukkanik qernertanik piniartunut pisassiiuaannarnerat Nammcop inassuteqaataanut akerliulluinnarpoq.
- Taamatut politikkersornerup suut kinguneqaatigissavai?
- Tunup kujataani qilalukkanik qernertanik piniarneq ingerlaannassappat Naalakkersuisut politikkimik ingerlatsipput, Kalaallit Nunaata nunani tamalaani tusaamaneqarneranik innarliisumik. Pinngitsoorani maluginiarneqassaaq Kalaallit Nunaata, uumasut qilalukkatut qernertatut ittut taama nalissaqanngitsigisut, illersorsinnaanngimmagit, Mads Peter Heide-Jørgensen Sermitsiamut oqarpoq.
Aviisimi Sermitsiami atuarnerusinnaavutit. Aviisi uani pissarsiariuk: