Professori ingerlatsisimanermik misissuisimaneq pillugu: - Atuarsimasanni ajornerpaavoq
Kommuneqarfik Sermersuumi ineqarnermut tunngatillugu suliassaqarfiup ingerlaneqarsimaneranik misissuinermi isornartorsiuinerit ingasassusaat amerlassusaallu maluginiarneqarsimavoq. Tamatuma saniatigut pisisimasut ilaat peqquserluttumik ingerlanneqarsimasinnaasut, professorip oqaatigaa.
Kommuneqarfik Sermersuup ineqarnermut tunngatillugu ingerlatsisimanera kukkunersiuisumit misissorneqarsimavoq, tamannalu pillugu nalunaarusiaq isornartorpassualinnik allattuiffiusimasoq saqqummiunneqarsimalluni.
Sermitsiaq.AG-p nalunaarusiaq Aalborg Universitetimi professorimut Per Nikolaj Bukhimut aningaasaqarnermik aqutsinermi pisortallut aqutsinerannik ilisimatusartumut saqqummiussimavaa.
Taassuma oqaatigaa, kommunimut isornartorsiuinerit amerlassusaat ingasattoq:
- Kukkunersiuisut nalunaarusiarisimasaannik hunnorujulikkaanik atuarsimavunga, mannalu atuarsimasannit ajornerpaavoq, Nikolaj Bukh oqarpoq.
- Oqaaseqaatigineqartorpassuit amerlassusaat ingasappoq.
Sukkut aallartittoqassava?
- Sukkut aallartittoqarsinnaanersoq naluara. Kommunimit pisimasut qanoq iluarsiiffiginiarsimaneqarnersut atuarlugu tamaviaarnarporluunniit, taanna ilanngullugu oqarpoq.
Sermitsiaq.AG-mit ulluni kingullerni oqaluttuarineqartutut, nalunaarusiami naqissuserneqarpoq namminersortutut aningaasaliissuteqartartut aalajangersimasut kommunimik isumaqatigiissuteqarnerminni "qaqutigoortumik iluaquserneqarsimapput". Isumaqatigiissutissarsiortoqarsimanngilaq aamma malittarisassat malillugit sanaartortoqarnissaanut pisortat taarsigassarsisitsisimapput.
Nalunaarusiami aamma illoqarfimmik ineriartortitseqatigiiffik NCD kommunilu kommuninut piginnaatitaaffiit unioqqutillugit iliuuseqartarsimasutut arlalitsigut isornartorsiorneqarput.
Per Nikolaj Bukhip nassuiaatigaa, kukkunersiuisup pingaarnertut assersuutigalugu kommuni aningaasaqarnikkut isumatusaartumik iliuuseqarsimanersoq, aningaasat sunniuteqarluartumik atorneqarsimanersut aamma aqutsisut siunertamut naapertuuttumik aalajangiissuteqarsimanersut misissorsimagai.
Misissortariaqarparsi
Nalunaarusiallu takutippaa, ingerlatsivimmi qitiusutut suliassaqarfiit arlallit taamatut ingerlanneqarsimanngitsut.
Nalunaarusiami aamma pisimasut ilungersunartut politikkerinit eqqumaffigineqartariaqartut oqaatigineqarpoq.
Ilaatigut kommunimi pisortaasimasup sanaartortussamut nunaminertamik tunniussinissaq pillugu ingerlatsivimmi aalajangiisoqarsimaneranik allannguisimaneranut tunngasoq eqqumaffigeqquneqarluni. Aallannguilluni aalajangiisimaneq sanaartortussamut iluaqusiisimavoq, allaganngorlugulu tunngavilersorneqarsimanani. Sanaartortussatut pineqartoq aamma illut portussusissaattut akuerisaasunit portunerusunik sanaartornissamut immikkut akuersissummik tunineqarsimavoq.
- Tamanna peqquserluuteqarsimasutut oqaatigineqarsinnaavoq. Misissorneqarsimanngilarli, kukkunersiuisoq tamatumannga misissuinissamut piumaffigineqarsimanngimmat, kukkunersiuisulli pisimasumik saqqummiussinermigut oqaatiginiarpaa: Misissortariaqarparsi.
Nakkutilliisut iliuuseqartussaasut
- Pisimasoq imminermini ingerlatsinermi allakkatigut tunngavilersuisussaanemut unioqqutitsineruvoq. Aalajangiineq tunngavilersorneqartussaavoq, aalajangiisimanerlu pillugu allassimasoqanngippat, aalajangiisimanermut tunngaviusoqarnersoq ilisimaneqanngilaq, Per Nikoalaj Bukh oqarpoq.
Professorip oqaatigaa, politikkerip suliaq eqqartuussissuserisumit missuiffigineqarnissaa aalajangersinnaagaa.
- Suliassaq killiligaavoq eqqartuussissuserisumit isumagineqarsinnaasoq, Per Nikolaj Bukh oqarpoq.
Professorip nalilerpaa, taamatut inissisimasoqarnera kommunalbestyrelsimi ilaasortat iternge tikillugu paasiuminaatsissinnaagaat.
- Nakkutilliisut maanna iliuuseqartussanngorput. Kommunimi politikkerit, kommunip Namminersorlutik Oqartussat peqatigalugit aaqqiissuteqarsinnaanera maanna tatigisariaqarpaat, taanna oqarpoq.