isorinninneq
Professori: Aleqap ajoraluartumik Danmarki assiliniarpaa
Innuttaasut uuliasiorluni aatsitassarsiorlunilu suliniutinut paasissutissanik pisinnaanerannik Naalakkersuisut siulittaasuata allannguiniarnera sakkortuumik isornartorsiorneqarpoq
Aatsitassanut suliniutini innuttaasut qaqugukkut paasissutissanik pissarsisinnaanerat Naalakkersuisut siulittaasuata Aleqa Hammondip, Siumut, allanngortinniarpaa. Siunnersuulli isornartorsiorneqarpoq.
– Aatsitassanut inatsimmut allannguutissatut siunnersuutip kingunerissavaa aatsitassanik suliniutinut paasissutissat isertuunneqarsinnaasut aalajangeereernerup kingornanut. Tamanna takunnissinnaanermut kinguariarnerujussuuvoq, taamatut isumaqarpoq Oluf Jørgensen, Danmarkimi Medie- og Journalisthøjskolimi pisortat ingerlatsinerannik ilisimatusarnermut pisortaq.
Tim Knudsen, Københavns Universitetimi naalagaaffimmi pissutsinut ilisimatooq, isumaqarpoq uggornartoq Aleqa Hammondip siunnersuummigut, nammineq isumani malillugu, Danmarkimi matoqqaniartarneq assiliniarmagu.
– Ajoraluartumik allaanngilaq Kalaallit Nunaata Danmarki assiliniaannartaraa, aalajangiisarnerni matoqqatitsinerup annertusiartornera eqqarsaatigalugu. Tamatuma kingunerisinnaavaa aalajangiinissat sioqqullugit paasissutissalimmik oqallinnerup ajornarnerulernera, Tim Knudsen oqarpoq.
Sten Bønsig, Aalborg Universitetimi ingerlatseriaatsimut lektori, isumaqarpoq Biinia Sakiusilu ersissutissaqanngitsut, Aleqa Hammondip siunnersuutaa akuersissutigineqassappat.
– Pineqarnerugunarpoq takunnissinnaanerup kinguartinneqarnera, tamassumalu kissaatigineqarnera politikkersornerulluinnarpoq. Illuatungaatigut soorunami tamatigut eqqarsarnartoqartarpoq takunnissinnaaneq killilerneqarniaraangat. Taamali oqareerlunga kinguneqaatissat eqqarsarnartoqartinngilakka.
Tamanna Sermitsiami atuarsinnaavat. Tassani inatsisissatut siunnersuut qisuariarfigineqartorujussuuvoq, aammalu annertunerusumik atuarsinnaavat Oluf Jørgensenip siunnersuutip kinguneqaatsissat qularnartoqartittorujussuugai, Sten Bønsingip eqqissisimaffiginerugai.