Professor Arne Villumsen Nersornaammik sølvimik nersornaaserneqarpoq

Inatsisartut siulittaasuata Lars-Emil Johansenip ullumi Københavnimi Bryggenimi nalliuttorsiorpalaartumik katerisimaarnermi professor Arne Villumsen Nersornaammik sølvimik nersornaaserpaa.
Taamatut tusagassiorfinnut nalunaarutikkut allappoq Inatsisartut Allattoqarfiat.
Inatsisartut Siulittaasoqarfiata professor Arne Villumsenip Nersornaammik sølvimik nersornaaserneqarneranut tunngavilersuutigaa, taassuma Danmarks Tekniske Universitetip ataani Arktisk Teknolgi-mi Sisimiuniittumi ingeniøritut ilinniagaqarneq sivisuumik nersortarialimmillu ineriartortissimammagu.
Siulittaasup Arne Villumsenimut oqalugiarnermini ilaatigut erseqqissaatigai:
"2006-imi Danmarks Tekniske Universitetimi (DTU) pisortatut Sisimiuni Artek-centerimi ulluinnarni pisortanngorputit, Artek-illu nunani tamalaani pilerinartutut pilersinnissaa pimoorullugu sulissutigisimallugu.
Ullumikkut takusinnaavarput ilinniagaqarfik ingerlalluartoq suliniummullu naatsorsuutigisanik tamakkiisumik naammassinnittoq. Ullumikkut ilinniagaqarfiuvoq ilisimatusarnermi angusat nassaallu atorsinnaasunngortinneqartarlutik niuernermi pilersaarutinut atasinnaasunut.
Nutaaliorfiup nunatsinni ingerlatsiviit, aallartitsisut, nassaarniartartut ilisimatuullu suleqatigai, sanaartornermi, nukissiornermi avatangiisinullu nutaaliortitsisumik isumassarsiat siuarsarnissaat sulissutigalugu".