royalt

Prins Henriup aarnuaa tillinneqartoq

Prins Henriup grønlandica-mik katersugaataanit aarnuaq Katuami saqqummersitsinermi tillinneqarsimavoq. Aarnuaq tunineqarsimavoq

Saqqummersitanit amerlajaanit dronning Margrethemit Prins Henrimmillu atukkiunneqartunit aarnuaq marlunngormat juulip 9-anni tillinneqarsimavoq.
– Aqaguani tillinneqarsimaneranik nalunaarfigineqarpugut ullorlu taanna nalunaaqutaq 17.30 missaani tillittut ilaat tigusarineqarpoq. Sukkasuumik pitsaasumillu politiit sulisimapput, vicepolitikommissær Janus Eigaard oqarpoq.
Aarnuarli Nuup illoqarfiata qeqqani angummut qallunaarpasissumut 50-it missaannik ukiulimmut tunineqareersimavoq. 600 koruunilersillugu.
Aamma atuaruk: Kalaallit Nunaannik asanninneq
Politiit angut aarnuamik pisisoq attaveqarfigerusuppaat, ilimagineqarmat angut taanna pisimasoq pillugu pingaarutilinnik ilisimasaqartoq. Tamatuma saniatigut aarnuaq kunngikkormiunut utertinneqarsinnaavoq.
Aarnuaq tassaavoq nannup kukiinik tuugaamillu puisimik qiperukkamik ujamiliaq.
Nuummi Politiit attaveqarfigisinnaavatut telefon 32 14 18-mut sianerlutit.

Powered by Labrador CMS