Preben Møller Great Greenlandimi pisortanngorpoq
Apriilip aallaqqaataani 2018-imili Preben Møller pisortatut ivertikkallarneqarpoq maannalu suliffeqarfimmi oktoberi 2018 aallarnerfigalugu pisortatut atorfinitsinneqavissalluni.
Preben Møller ukiorpassuarni tunisassiortutut aqutsisutullu misilittagaqarpoq taamaalillunilu suliffeqarfimmi amminik tunisinermiit sulisunik aqutsineq ilanngullugu ilisimaarilluarlugu.
- Ukiorpassuarni Great Greenland A/S-ip puisip amia ilusilersuinerup atisaliornerullu silarsuaani saqqummiulluartarsimavaa. Taamaattumillu Preben pisortanngorpoq piffissami suliffeqarfiup puisit amiinik amigaateqarfiani aammalu piffissami nunarsuatsinni puisit amiisa annertuumik piumaneqarfianni, ingerlatseqatigiiffik tusagassiuutinut nalunaarummi allappoq.
Puisip amiinik amerlanerusunik pissarsiniartoq
- Suli amerlanerusunik amernik peqalernissarput pingaartilluinnassavara. Tunitsiviit sumiiffii naleqquttut amerlanerusullu misissorneqarnissaat pisariaqarpoq. Puisit amiinik niuerfimmi soqutiginninnerujussuaq ataavartinniassavarput aammattaaq puisit amiisa tunisassiarisartakkatta pitsaassusaat qularnaartuartariaqarlugit. Puisip amia tassaavoq suliffeqarfiup piuneranut tunngavik, Preben Møller tusagassiuutinut nalunaarut naapertorlugu oqarpoq.
Siulersuisut Preben Møllerip suleqatiginissaanut qilanaarput Great Greenland A/S-illu siunissaa isumalluarfigalugu.
Sanarfineqarnera nutaamik aallarnisarneqassaaq
- Preben Møller arlalinnik ilinniagaqarpoq aqutsinermilu ilinniarsimasuugami suliffeqarfiup pisariaqartitai matussusersinnaallugit. Suliffeqarfiup maanna sanarfineqarnera nutaamik aallarnisarneqassaaq amminillu pisiortorneq piniartut inuussutissarsiornerullu akornanni oqaloqatigiinneq ukkatarlugu ingerlanneqassalluni. Ilanngullugu Preben Issittumi atisatigut atisalioriaatsinullu suliffeqarfiup nukitunerusumik inissisisilernissaa aallarnisaavigissavaa