Preben Møller Great Greenlandimi Pisortaanertut ingerlaqqippoq

Great Greenlandip siulersuisuisa aalajangersimavaat, Preben Møller ukioq manna oktobarip aallaqqaataata tungaanut pisortaanertut atorfeqartinneqarsimasoq pisortaanertut ingerlaqqissasoq. Ingerlatseqatigiiffik tusagassiorfinnut nalunaaruteqarluni taamatut ilisimatitsivoq.

Preben Møller ukiorpassuit produktionschefitut atorfeqareerluni pisortaanertut 2018-imi oktobarip aallaqqaataani ukiunut pingasunut sivisussusilerneqartumik atorfinitsinneqarpoq. Pisortaaneq Ditte Sorknæs ukiuni marlunni atorfeqareerluni tunuartoq taarserlugu pisortaaninngortinneqarluni.

Preben Møllerili suli tunniussassaqartoq siulersuisut isumaqarput.

Piffissamilu pineqartumi maannamullumi, ersarissumik Preben pitsanngoriaatinik takutitsinikuuvoq suliassallu ilutigalugit ineriartortitsinera ersarissimaqaaq.

Ukiullu pingasut maanna qaangiunnerini suliffeqarfik sutigut tamatigut pitsanngoriaateqarpoq, siulersuisut tusagassiorfinnut nalunaaruteqarlutik allapput.

- Isumaqanngilagut unammilligassat tamarmik qaangerneqartut, upperaarpulli Preben Møller tassaasoq suliffeqarfiup siunissami unammilligassaanut takkuttussanut siuttooqqissinnaasoq sulilu angusassaqarluartoq, siulersuisuni siulittaasoq Juliane H. Heilmann oqarpoq.

Siulersuisut tatiginninnerat nuannaarutigigaa

Preben møllerip suliniutit aallartissimasami ingerlateqqinnissai qilanaaraa.

- Siulersuisunit tatigineqarnera ukiunilu kingullerni pingasuni suliarisimasakka ajorineqannginnerat qujanarpoq. Tamanna nuannaarutigaara. Suliffeqarfimmi ingerlaqqissinnaanera anguniagassatullu siunniussimasamma ingerlateqqinneqarnissai qujamasuutigilluinnarpakka, taanna Sermitsiaq.AG-mut oqarpoq.

Siulersuisunit oqaatigineqarpoq, Preben Møllerip ukiuni pingasuni pisortaanerunermini ilaatigut ammit pitsaassusaannik qaffassaaqataasimasoq, siulersuisunik, pginnittunik peqatigiiffinnillu suleqateqarnermik pitsanngorsaaqataasimasoq, tunisassiornermi periutsinik pitsanngorsaajuarsimasoq, tigooqqaaviit amerlisarniarlugit suliniuteqarsimasoq aamma suliffeqarfiup aningaasaqarnikkut aqutsinera pitsaanerulersillugulu akiitsunik ikilisaasimasoq.

- Prebenip nukittoqutigivaa suliffeqarfiup tunisassiornerata nukittorsarnissaanik ilisimasaqarluarami suleqateqallaqqillunilu. Ukiuni tulliuttuni suleqatigeeqqinnissarput qilanaareqaarput, siulersuisuni siulittaasoq oqarpoq.

Suliffeqarfimmi ukiuni aggersuni pingaarnertut ukkatarineqassapput puisit amiinik tunisaqartarnerup annertusineqarnissaa aamma puisit amiisa pitsaassusaannik qaffassaanissaq, Preben Møller ilisimatitsivoq.

Ingerlatseqatigiiffik 2020-mi fire millioner koruuninik sinneqartooruteqarpoq, ukiup pineqartup siuliini pingasuni amigartooruteqartarsimalluni.

Great Greenlandimi ukiumoortumik naatsorsuutit
Powered by Labrador CMS