Portugalimiut Nunatsinnik soqutiginnittut
Ilisimatuutut suliniummi nutaami Portugalimiut Kitaata sineriaani 1930-mit 1970-imut aalisarnerat qulaajarneqassaaq.
Portugalimiut piffissami 1931-mit 70-ikkut aallartilaarnerannut Kitaata sineriaani annertuumik saarullinniarput.
Aviisi Sermitsiaq taama allappoq.
Aalisarnerat tamanna Imarsiornermut Katersugaasivimmi Ilhavomiittumi, Portugalimi illoqarfiit pingaarnersaannit Lissabonimit 100 kilometerinik avannarpasinnerusumiittumi Atlantikup sineriaaniittumi katersaateqarfigineqarpoq.
Piffissaq soqutiginartoq
- Kalaallit Nunaanniittut kikkut tamaasa, Portugalimiut aalisartuinik Kalaallit Nunaanniissimasunik oqaluttuarsinnaasut attaveqarfigerusuppavut, ilisimatuutut suliniummi aqutsisoq itsarnisarsiooq Jorge Branco Sermitsiamut oqarpoq.
– Kalaallit Nunaanni katersugaasiviit arlallit attaveqarfigereerpavut, isumaqarpugulli inuit namminneq assinik oqaluttuanillu, Portugalimiut aalisarnikkut oqaluttuarisaanerannut soqutiginartumut qulaajaanitsinnut ikiorsiissutaasinnaasunik peqassasut.
Portugal Newfoundlandip eqqaani, Canadap kangimut sineriaani, qangali aalisarnermik ingerlatsisarsimavoq. Tamaani aalisarneq 1800-kkunnili aallartissimavoq. Saarulliit nikikkiartornerat naapertorlugu 1931-mi Kitaata avataani aalisarnertik aallartippaat.
Aviisimi Sermitsiami atuarnerusinnaavutit. Aviisi uani pissarsiariuk: