Portørit kaammattuisut: Suliumajunnaaritsi
Portørit isumaqatiginninniartunut kaammattuutigaat, isumaqatigiissutissaq nutaaq pillugu isumaqatiginninniarnerit aallarteqqissagaat, portørinullu kaammattuutigalugu Namminersorlutik Oqartussat aningaasarsiat malunnaatilimmik aaqqiiffiginngippatikkit suliumajunnaaqqullugit.
SIK malillugu aningaasarsiarineqartartut isumaqatiginninniutigineqarnerat qaammatini arlalinni uninngasimavoq, pilersaarutillu malillugit isumaqatiginninniarnerit martsip 31-ani naammassineqartussaallutik.
Dronning Ingridip Napparsimmavissuani portørit tusarfimmit tutsuiginartumit ilisimatinneqarsimapput, SIK-p Namminersorlutillu Oqartussat isumaqatiginninniarnerat uninngasoq.
- Ilisimatitsissut tamanna tunngavigalugu portørit ataatsimiigiaqqusimavavut. Taamaammat isumaqatiginninniartunut kaammattuutigaarput isumaqatiginninniarnerit nangeqqissagaat. Namminersorlutik Oqartussat tungaannit aningaasarsiat qaffaaffigineqarnianngippata aamma isumaqatiginninniarnerit unitsikkallarneqarsimappata, SIK-mut kaammattuutigerusupparput assigiinngitsunik suliaqartut sulinerannik unitsitsissasut, portørit peqatigiiffianni siulittaasoq Ujarak Jessen Heinrich oqarpoq.
Assigiinngitsunik suliallit aningaasarsiaqarnerulernissaat kissaatigineqartoq
Politikkerit ukiuni kingullerni isumaqatiginninniartunut akuliummata, portørit perorsaasullu aningaasarsiaqarnerulersimapput. Assigiinngitsunik suliallit taakku marluullutik SIK-p isumaqatigiissutai malillugit aningaasarsiaqartartunut allanut sanilliullutitk aningaasarsiaqarnerusarput.
Pørtørtit peqatigiiffianni siulittaasup erseqqissaassutigaa, kingullermik aningaasarsianut aaqqiissutaasimasut naammanngilluinnartut.
- Qaffasinnerungaartunik aningaasarsiaqalerusuppugut, kaasarfitsinni malugisinnaasatsinnik. Qaffasinnerulaartunik aningaasarsisalernikuuvugut, taakkuli naammanngilluinnarput, siusinnerusumummi sanilliullugu suliaqarnerulernikuuvugut. Tamatuma saniatigut Nuummi mittarfik allilerneqaleruttorpoq, ajoraluartumillu isumaqarpunga peqqinnissaqarfik malinnaanngitsoq, Ujarak Jessen Heinrich Sermitsiaq.AG-mut oqarpoq, nangillunilu:
- Timmisartoq 300-nik ilaasulik ukiut marluk qaangiuppata mittalertussaavoq, ajornerpaamillu pisoqassappat sulisut ikittuinnaagatta tamanna qanoq isumagisinnaassanerlutigu naluara, Ujarak Jessen Heinrich oqarpoq.
Suliumajunnaarnissamut piareersimaqqusisoq
Taassuma ilanngullugu erseqqissaassutigaa, portørit isumaqarmata SIK-p isumaqatigiissutai malillugit sulisut tamatigut ”kingullinngortinneqartarut” peqatigiiffik taamatut qisuariartoq.
- Portørit peqatigiiffiat suliumajunnaarnissamut piareeqqavoq, sineriammilu portørinut allanut kaammattuutigalugu suliumajunnaarnissamut piareersimaqqullugit. Salliutinneqanngittuaannarnerput naammagilerparput, portørit peqatigiiffianni siulittaasoq naggasiivoq.
Aningaasarsiat aaqqiivigineqarnissaasa saniatigut portørit sulinermi pitsaanerusunik atugassaqartinneqarusupput. Suliffimmi minnerpaamik marlunnik portøreqartoqartariaqarpoq aamma atortut pisoqalisimasut nutarterneqartariaqarput.
Sermitsiaq.AG-mit SIK-mi siulittaasoq oqaaseqartinniarneqarpoq.