Poppel: Partii Naleqqap arnat innimiilliorfigineqarsimasut suusupagivai
Partii Naleqqap Mikael Petersenimik atorfinitsitsinermigut kinguaassiuutitigut innimiilliortoqartarnera toqqaannanngitsumik akuersaarpaa, adjunkti naliliivoq.
Pingasunngormat saqqummiunneqarpoq, Siumumi allattaasimasoq Mikael Petersen Partii Naleqqami allatsitut suliffittaarsimasoq.
Tamanna arnanik qulinik Mikael Petersen partiip allaffiani innimiilliortarsimaneranik unnerluussisimasunik suusupaginninnertut isigineqarsinnaavoq. Taamatut naliliivoq Mariekathrine Poppel, Ilisimatusarfimmi adjunkti, ilaatigut naligiissitaaneq pillugu ilisimatusarsimasoq:
- Arnat qulit kinguaassiuutitigut innimiilliorsimaneq pillugu unnerluussutaat aamma Mikael Petersenip ammasumik nassuersimanera Partii Naleqqamut Hans Enoksenimullu, politiinut nalunaarutiginnittoqarsimannginneanik innersuussuteqaannartumut eqqarsalersitsisimarpassinngillat. Taamaammat atorfinitsitsineq aamma arnanik innimiilliorfigineqarsimasunik suusupaginninnertut misinnarsinnaavoq, Mariekathrine Poppel Sermitsiaq.AG-mut oqarpoq.
Taanna isumaqarpoq, nunami maani kinguaassiuutitigut innimiilliortarnerit innarliisarnerillu oqaluuserineqarneranni Partii Naleqqap Mikael Petersenimik atorfinitsitsinera naapertuutinngitsoq:
- Oqaatigissallugu pingaaruteqarpoq, minnerunngitsumik politikkerit inatsisiliortartut sulisitsisutut maligassiuisuusariaqaraluarnerat, allattoqarfimmimi sulisuminnut sulisistsisuupput, adjunkti oqarpoq.
Ingalaffigisimasariaqaraluaraat
Aamma Kalaallit Nunaanni Naligiissitaanissamut Siunnersuisoqatigiit siulittaasuat Kathrineq Bødker isumaqarpoq, pisoq oqalinnermut naapertuutinngitsoq:
- Piffissanngorpoq, ullumikkut Kalaallit Nunaanni arnanut nikassaasumik peqqarniitsumillu pissusilersortarnermut isummertalernissarput ingalassimatitsinissarpullu, Kathrine Bødker oqarpoq.
Mariekathrine Poppel isumaqarpoq, Partii Naleraq Mikael Petersenimik atorfinitsitsigami, kinguaasiuutitigut innimiilliortarneq pillugu erseqqissumik isummersimasariaqaraluartoq.
Poppelimit maluginiarneqarsimavoq, partiimi siulittaasup Hans Enoksenip KNR-mut oqaaseqarnermini, kinguaassiuutitigut innimiilliortarneq pillugu Mikael Petersenimik oqaloqateqarsimanerminik, tassungalu tunngatillugu partiip akuersaanngilluinnarneranik erseqqissaassuteqarsimanermik eqqaasaqanngittsoq.