Poppel: Kangerlussuarmi?

Nuummi Ilulissanilu mittarfiliornernut atatillugu inuiaqatigiit aningaasaqarnerannut sunniutaasussanik nalileeqqissimanerup takutippaa, mittarfiit ukiut 30-t ingerlaneranni inuiaqatigiit aningaasaqarnerannut 700 millioner koruunit missaannik sinneqartooruteqartitsissasut.

Ilisimatusarfimmi aningaasarsiornermik ilisimasallip Emeritusiusullu Birger Poppelip kukkunersiuisarfiup Deloittep naatsorsueqqissimanera misissorsimavaa. Poppelip oqaatigaa, nalorninartupilussuit ilaat naatsorsuinermi isummerfigineqaratillu ilanngunneqarsimanngitsut.

Birger Poppelip ilaatigut oqaatigaa, Kangerlussuup siunissaata naatsorsueqqinnermi ilanngunneqarsimannginnera annertuumik allanngortitsisinnaasoq.

Nuummi Ilulissanilu mittarfissat atorneqalerpata imarpik qulaallugu angallassinerit tamarmik illoqarfinnut taakkununnga apuunneqartalernissaat tunngavigalugu naatsorsueqqittoqarsimavoq.

Kangerlussuup siunissaa nalorninartoq

Poppelip tassunga atatillugu oqaatigaa, Kangerlussuarmi mittarfiup qanoq pineqarniarnera politikkikkut suli isummerfigineqarsimanngitsoq, assersuutigalugulu Nuummi sila ajussappat Kangerlussuarmut suli mittoqarsinnaannasoq.

Tamatuma inuiaqatigiit aningaasaqarnerannik naatorsuisimaneq marlutsigut sunnerneqassasoq, Poppel oqarpoq. Ilaatigut angalanermi piffissamik sivikinnerusumik atuisoqartalerpat iluanaarutissarpassuartut naatsorsorneqarsimasut annikinnerulissapput, ilaatigullu Namminersorlutik Oqartussat Kangerlussuarmik ingerlatsinermut aningaasartuuteqarnerulissallutik.

- Inuit Kangerlussuarmut ingerlanneqartariaqassappata, taava assersuutigalugu akunnittarfimmi inissinneqatassappat, Birger Poppel aperivoq.

Nuuk Ilulissallu aalajangersimasumik ukkatarineqarusuttut

Namminersorlutik Oqartussanit Sermitsiaq.AG-mut ilisimatitsissutigineqarpoq, naatsorsuinermi Kangerlussuup mittarfianut siunissami tikittoqartarnissaata inuiaqatigiit aningaasaqarnerannut sunniutigisinnaasai ilanngunneqarsimanngitsut, Naalakkersuisut nalunaarusiornermi misissorusussimammassuk, Nuummi Ilulissanilu mittarfiliornerit suli isumasssarsiatsialaanersut.

Sanaartortsitsinernut missingersuutigineqarsimasut 900 millioner koruunit missaannik amerlanerulermata, inuiaqatigiit aningaasaqarnerannut sunniutissat naatsorsoqqinneqarsimapput. Biger Poppelillu tassunga atatillugu erseqqissaassutigaa, naatsorsuutigineqartutut sanaartornerit ukiut pingasut missaat qaangiuppata naammassineqarnissaat suli nallertinnagu missingersuutigineqarsimasut sinnerneqaqqissinnaanerat ilimanarsinnaasoq.

- Aningaasarpassuanngorsinnaasut

- Ilulissani mittarfiliorneq nunamik qeriuaannartumik qanoq annertutigisumik piiaasoqariarluni allanik taarsiisoqarnissaanik ilisimasaqarani missingersuusiortoqarsimavoq. Aamma naatsorsuinermi oqaatigineqarsimasariaqaraluarpoq, Nuummi sanaartornermut missingersuusiarineqarsimasut qaangerneqaqqissinnaaerat nalornissutigineqartoq.

- Aningaasarpassuanngorsinnaasut naatsorsuutigaara. Nalorninartoqarneralu oqaatigineqarsimanngilarluunniit, Birger Poppel Sermitsiaq.AG-mut oqarpoq.

Ilulissani nunamik qeriuaannartumik piiaanissap akisusinnaaneranik isummersimaneq, Kalaallit Airports Internationalimit Namminersorlutillu Oqartussanit akerlineqarluni oqaatigineqarpoq suliat aningaasaqarnermut ulorianartorsiortitsinavianngitsut.

Namminersorlutik Oqartussanit allakkatigut akissuteqarnermi ilisimatitsissutigineqarpoq, "nunamik, issumik, qeriuaannartumik ujaqqanillu qaartitikkanik qanoq annertutigisunik piiaanissaq missingerniarlugu" suliassaqarfik tamakkerlugu aaqqissuussaasumik misissueqqaartoqarsimasoq.

KAIR: Aningaasaqarneq ulorianartorsiortinneqanngilaq

- Sanaartorfiuniartoq tamaat 3D atorlugu assiliorneqarsimavoq. Piumasaqaataasimasut taakku sanaartornermi tunngavigineqartussaapput, tassunga ilanngullugu annertussutsinik naatsorsuisimanermut nikingassutaasinnaasut naatsorsorneqarsimallutik. Taamaammat nunamik qeriuaannartumik piiaaneq Ilulissani mittarfiliorneq aningaasaqarnermut ulorianartorsiortitsisinnaasutut isigineqanngilaq, akissuteqaammi allassimavoq.

Birger Poppelip oqaatigaa, naatsorsuisimasut sanaartornermi aningaasartuuteqarnerulersinnaanerup saniatigut coronap tuniluunnerata kinguneqaatigisinnaasai ilanngullugit naatsorsuisimasariaqaraluartut.

Nunarsuaq tamakkerlugu ukiuni marlunni kingullerni tuniluuttoqarnera nunami maani takornariartitsisarnermut annertuumik kingunerlutsitsisimavoq, tamannali 2019-imiit silaannakkut angallassinermi ilaasut amerlassusaat tunngavigalugit naatsorsuisimanermi ilanngunneqarsimanngilaq. Birger Poppelip aamma oqaatigaa, corona nunarsuarmi tuniluummat pisortat ingerlaqarfippassuini suliffeqarfippassuarnilu assersuutigalugu Zoom aqqutigalugu imaluunniit digitalikkut atortorissaarutit aqqutigalugit ataatsimeqatigiittoqartalersimasoq, tassa imminnut naapeqatigiinniarlutik angalanissaraluamut taarsiullugu.

Coronap silarsuaq allanngortissimagaa

- Coronap qanoq sunniuteqarsimanera isummerfigineqarsimanngilaq. Tamannaavoq ajuusaarutigisara.

- Tamatumunnga kingullermik isummertoqarmalli silarsuaq allanngorsimaqaaq, Birger Poppel oqarpoq.

Naatsorsuisimanermi naatsorsuutigineqarpoq, 2025-mi Nuummi Ilulissanilu mittarfinniit aallartut mittarfinnullu tikittut 199.000-it missaanniissasut.

Namminersorlutik Oqartussanit Poppelip isornartorsiutaanut akissuteqarnermi ilisimatitsissutigineqarpoq, nalunaarusiami ilaasut amerlassusissaannik naliliisimanerup allanngornissaa ilimagineqanngitsoq, erseqqissaassutigineqarlunilu kisitsit taaneqartut Visit Greenlandip missingiutigisimasaanut naapertuuttut. Namminersorlutik Oqartussat naapertorlugit, ilaasussat aatsaat taamak amerlatigilernissaat pillugu mianersortumik missingiisoqarsimasoq.