Poppel inissaqartitsiniarnermut periuserineqartumik isornartorsiuisoq: Aalajangiisimaneq paasisassaanngilaq
Aningaasarsiornermik ilisimasallit marluk Kommuneqarfik Sermersuup innuttaasunut inissaqartitsiniarnermini periuserisaa akerleriiffioqisoq nalilersimavaat. Aappaata inissaqartitsiniarluni periuserineqartoq ajornartorsiutaasoq oqaatigaa. Aappaalu tassunga isumaqataavoq, erseqqissaassutigaluguli taamatut periuseqarsimanermut pissutissaqartoqarsinnaasoq.
Kommuneqarfik Sermersuumi illuatungiliuttutut politikkerit isumaqarput, kommuni ineqarnermut suliami akileraartartut aningaasaataannik asuli atuisimasoq.
Siumumeersup Inga Dora G. Markussenip assersuutigalugu oqaatigisimavaa, init 400-t missaanniittut attartornerannik isumaqatigiissutip atorunnaarpata, kommuni inissaqartitsiniarnermik suli ajornartorsiuteqassasoq.
Kommuni attartornernut amigartooruteqarfiusunut 100 millioner koruunit sinnerlugit akiliuteqartaraluarpalluunniit, attartornissamik isumaqatigiissutit atorunnaarpata, kommunimi suli inissaaleqisoqassaaq, Inga Dora G. Markussenip tunngavilersuutigisimavaa.
Akerlianik borgmesterip Charlotte Ludvigsenip arlaleriarluni erseqqissaassutigisimavaa, inissaqartitsiniarnermi periuserineqartoq siunertamut naapertuuttuusoq, aamma nammineq sanaartortitsinissamut sanilliullugu inissanik attartorsimaneq kommunimut akikinnerusoq.
Sermitsiaq.AG-p suliaq aningaasarsiornermik ilisimasalinnut marlunnut saqqummiussimavaa, tassani kommunip periuserisimasaa akerleriissutaaqisoq nalilertinniarlugu.
Assigiinnaraa iloqqutsilluni
Ilisimatusarfimmi aningaasarsiornermik ilisimasallip Emeritusiusullu Birger Poppelip Inga Dora G. Markussen ilumoornerarpaa.
- Ilumoorpoq. Kommunip taamatut aalajangiisimanera paasiuminaapput, Birger Poppel Sermitsiaq.AG-mut oqarpoq.
Taassuma oqaatigaa, aningaasaqarneq eqqarsaatigalugu kommunip iliuuseqarnermini kissassimaarniarluni iloqqutsinermut assingusoq.
- Piffissaq ungasinnerusoq eqqarsaatigalugu kommunip inissisimaffia allanngornavianngilaq - tassa kommuni innuttaasunut inissaqartissallugit pisussaaffigisaminut inissaqartitsinavianngilaq. Aappaatigulli kommuni namminersortut sanaartornissaanut tamakkiisumik aningaasaliisimavoq, iluaqutigisinnaasaminillu taarsigassarsisimalluni. Isumaqatigiissutit atorunnaarpata, kommuni nammineq inissialiortitsilersimanngikkuni namminersortut attartoqqittariaqassaaq, Birger Poppel oqarpoq, nangillunilu:
- Imminut ajoqusertoq
- Kommuni imminut ajoquserpoq. Kommuni maanna sanaartortitsilinngikkuni, ukiualuit qaangiuppata inissiat nungullarsimaqisut kisiisa pigilerlugit, pisortat inissiaataannik nutaajunerusunik peqarunnaassaaq. Kommunimit anguniagaavoq, Nuummi innuttaasut amerlanerulersinneqarnissaat, illoqarfimmullu nutsertut amerliartuinnarlutik. Taamaammat pisortat inissiaataannik pisariaqartitsineq taamaaginnartussaavoq.
Birger Poppelip tamanna tunngavigalugu oqaatigaa, Nuummi pisortat inissiaataannik sanaartortoqarnissaanut pilersaarusiornissaq nukiginnartuusoq.
Aalborg Universitetimi aningaasarsiornermik ilisimasallip professoriusullu Per Nikolaj Bukhip Birger Poppel isumaqatigaa, oqaatigaluguli kommunip pingaarnersiuisimanernut iluaqutaasussanik pissutissaqarsinnaasoq.
Professori: Namminersortuni tamanna aamma atugaasarpoq
Professorip oqaatigaa, periuserineqarsimasup kommunip piginnaatitsissutaata avataaniinneranik Nakkutilliisut naliliisimanera isumaqatigalugu, aammali oqaatigalugu nammineq sanaartortitseriarluni piginnittuunermut sanilliullugu attartorneq aningaasaqarnermut iluaqutaanerusinnaasoq:
- Kommunip nammineq sanaartortitsinera imaanngilaq aningaasaqarnermik pitsaanerulersitsissasoq. Ullumikkut assersuutigalugu takuneqakkajuttarpoq, suliffeqarfiit namminersortut ingerlatseqatigiiffinnut allaffiliortitsisarnerat, suliffeqarfiup namminersortup attartugassaanik. Suliffeqarfiit namminersortut taamaallaat sanaartortitsisarput, nammineq piginnittuunermut sanilliullugu attartorneq iluaqutissartaqarnerusarmat, Per Nikolaj Bukh nassuiaavoq.
Taassumali aamma erseqqissaassutigaa, periuserineqartumut piffissaq sunniuteqarsinnaasoq:
- Assersuutigalugu kommunimit isumaqartoqarpat ukiuni arfinilinniit qulit tungaannut namminersortut niuernermit atugassarititaasut malillugit inissialiortitsinissamik suliariumannittussarsiuussinissamik pisariaqartitsisoqalissasoq, imaluunniit inissianik pisariaqartitsisoqarunnaassasoq. Taava sanaartortitsinissaq iluaqutaanavianngilaq. Taamaammat attartornissaq iluaqutaanerussaaq, Per Nikolaj Bukh oqarpoq.
Ineqarneq pillugu suliaq paasisaqarfigineruju, uani.